Kiơ̆ đơ̆ng Hop akŏm hơlen, lơ̆m tŏk bŏk jăl jang 2020-2025, mŭk drăm-tơpôl kơ dêh char oei đei lơ tơdrong tơnap tap. Mă lei, akŏp tơmam drăm lơ̆m dêh char oei tŏk 9,1% pơtêng hăm sơnăm 2020, lơ hlŏh pơkăp 8,6% mă hop akŏm tơlĕch ăn.

Tĕch mơdro tơ̆ teh đak đe kơ dêh char, mă kăl ‘nŏh tĕch mơdro tơ̆ teh đak đe găh tơmam drăm chŏh jang sa đei hơ iă, sơnăm đơ̆ng rŏng iŏk đei lơ hloh sơnăm hơdrol, hăm đei tŏk jô̆ hơtŏ 6,92% lơ̆m 1 sơnăm. Hop akŏm jei tơƀôh hơdăh dôm tơdrong jang tim mă ‘lơ̆ng, tơdrong pơm glăi kơ mĭnh ƀar ‘nu kang ƀô̆, đang viên. Bơ̆ jang Pơprŏ hơdrol kơ dêh char jăl jang 2021-2030, lăng truh 2050 oei hiơ hiơ̆ pơtêng hăm trong tơlĕch ăn. Tơ̆ hop akŏm, lơ kơdră tang măt hlôi pơma dơnuh, pơchoh trong vă jang keh đang rim tơdrong jang mă tơdrong Tơchơ̆t đơ̆ng Hơnih Đảng dêh char tơlĕch ăn. Kiơ̆ đơ̆ng ƀok Nguyễn Anh Dũng- Tỉnh uỷ viên, Bí thư Đảng uỷ, Kơdră chĕp pơgơ̆r Hơnih bơ̆ jang vei lăng jên hu dêh char Gia Lai, lơ̆m lơ trong tơlĕch jang mĭnh poăt jăl jang hơtuch kơ jăl jang 2020-2025, dêh char kăl iung jang hơdrol ăn tơgum djru hơnih mơdro sa, atŏk kơtang pơm tơlĕch tĕch mơdro tơmam drăm.