Kiơ̆ Anih pơgơ̆r krao hơvơn plang song pham dêh char Gia Lai, đơ̆ng blŭng sơnăm truh dang ei, lơ̆m dêh char đĭ pơgơ̆r đei 45 ‘măng plang song pham, iŏk đei hlŏh 9 rơbâu tơpu pham, đei 57% nơ̆r hơgăt đơ̆ng Anih pơgơ̆r jang kơ tĕh đak krao hơvơn vang plang song pham pơjao ăn. Lơ̆m tơdrong plang song pham ‘măng mă âu, Anih pơgơ̆r tơlĕch kơsô̆ hơgăt tŏ sĕt hlŏh ‘nŏh iŏk đei 600 tơpu pham, tơgop pơtruh măh mai pham vă hơmet ăn bơngai jĭ lơ̆m pơyan he. 

Ƀlep ƀât ‘măng mă âu, Kơdră vei lăng kon pơlei dêh char Gia Lai hơpăh ƀăng khen ăn 5 khul grŭp, 7 ‘nu bơngai jang tơnăp ‘lơ̆ng lơ̆m tơdrong plang song pham sơnăm 2022-2023. Anih pơgơ̆r krao hơvơn plang song pham dêh char hơpăh hla ar hôn bơnê, pôk pơ ư 12 khul grŭp, 8 unh hnam, 28 ‘nu bơngai jang tơnăp ‘lơ̆ng lơ̆m tơdrong krao hơvơn plang song pham.