Hrei ‘nâu, tơ̆ dêh char Gia Lai đei 1049 anih pơtho pơhrăm. Bơ̆ jang kiơ̆ tơdrong Tơchơ̆t 29, dêh char hlôi tơjur 83 anih pơtho pơhrăm pơtêng hăm 10 sơnăm adrol ki, 80% kăn ƀô̆ vei lăng, thây kô đei pơtho hơmet ‘lơ̆ng tôm tơdrong kăl. Kŭm hăm ‘nŏh, trong pơtho pơhrăm; trong pơgơ̆r thi, kiêm tra păng hơlen năng tơdrong pơtho pơhrăm kŭm đei tơplih ‘nao; tơdrong jang tơchĕng hơlen khoa hŏk, pơlung hŏk tro, sinh viên đei đon tơchĕng iung jang xa đei năng kăl ƀiơ̆. 99,6% hŏk tro kon kông hŏk đang lăm 5; iŏk pơtho nơ̆r Jarai păng Bahnar tơ̆ hnam hŏk.

Mă lei, hăm tơdrong đei đơ̆ng dêh char groi kông, 46% kon pơlei ‘nŏh jĭ bơngai kon kông; kon pơlei oei xa răh rai tơ̆ dôm tơring hơtăih yăih,.. pơm ăn tơdrong tơlĕch jang kiơ̆ tơdrong Tơchơ̆t 29 tơƀâp lơ pơmat tat. Tơdrong pơtho hŏk phô thŏng pơtơm jang kiơ̆ đơ̆ng sơnăm hŏk 2020-2021 tam mă trŏ khei ‘năr hơgăt đei tơlĕch; dêh char oei ưh kơmăh hlŏh 4.500 ‘nu thây kô, bơngai jang. Tơdrong tơmât hơdai hnam trưng, lăm hŏk tơnap tap vă gơ̆h jang đei; tơdrong pơtho tơdrong jang tam mă pơm lăp hăm tơdrong ‘mĕh vă mât jang hơdoi.