‘Năr 5/7, Khŭl chĕp kơ̆l pơgơ̆r Đảng bộ dêh char Gia Lai pơgơ̆r hop akŏm ‘măng mă 16 (pơih să). Roi tơbăt tơ̆ hop akŏm ăn ƀôh, kơsô̆ tơlĕch jên tơmơ̆t jang kơ teh đak tơ̆ dêh char iŏk đei tŏ sĕt, ‘nao lăp đei 22,4% păng oei tŏk bŏk tơƀơ̆p ƀơm lơ mơmat tat. Sơnăm ‘nâu, dêh char Gia Lai đei pơjao hloh 4.300 ti hlak jên tơmơ̆t jang kơ teh đak păng kơsô tơpă pơjao đĭ vă jê̆ 3.800 ti hlak jên. Mă lei, kơsô̆ tơlĕch jên jang kơ dêh char lăp đei 22,4%. Hơdrô̆ 3 tơdrong jang tơm kơ teh đak găh pơjing tơring tơrang ‘nao, tơjur dơnuh hin păng hơtŏk tơiung mŭk drăm tơpôl tơring kon pơlei kon kông, đei đơ̆ng 15% truh 23%. Kiơ̆ kơ dôm bơngai tang măt vang truh hop akŏm, chĕng hơmet iŏk yua teh oei tơ̆ dêh char tam mă đei hơmet ming, ‘noh jĭ tơdrong tơm hơnhăk truh hiơ̆ tơlĕch jên jang.

Dang ei dôm tơdrong jang tơm kơ dêh char nhen Tơdrong jang pơm Trong gơlang mŭk drăm păih Hơlĕch, dôm tơdrong jang pơm dơnâu mong đak, hơmet ăn kon pơlei oei sa tơring kon kông tă kơ hiơ̆ ngăl yua kơ tơdrong tơm ‘nâu. Hơdai hăm ‘noh, jên thu iŏk yua teh đei tôch kơ tŏ sĕt pơting hăm trong tơlĕch jang kŭm jing tơdrong tơm pơm ăn mơ̆n. Lơ tơdrong jang iŏk yua jên jang âu đei bơ̆jang iŏk đei lơ, dăh mă đĭ jang đang, ‘noh ưh kơ đei jên vă kla.