2 sơnăm kơ au, jô̆ đơ̆ng ŭnh hơyuh kial N13 găh Hnam kmăi Ŭnh hơyuh Ia Le 1 kơ  Kŏng ty tơmơ̆t jên jang atŏk tơ iung ŭnh hơyuh kial Cao Nguyên 1 pơm keh đang, 5 ‘nu bơngai lơ̆m ŭnh hnam mŏ Phạm Thị Hòa (thôn Phú Bình, tơring Ia Le, apŭng Chư Pưh) măh erih sa hăm lơ̆m jơhngơ̆m đon oei ưh kơsơ̆n dơ̆ng ưh kơsŭk. Kơ yuơ pơbŭng hnam mŏ tŏk bŏk erih sa lăp hơtăih kơ jrăng ŭnh hơyuh kial 80 mét. Dôm tơdrong oei sa, jang sa kơ ‘năr jei găh tơ̆ hơla vơvĕr ŭnh hơyuh kial tih tên. Ŭnh hnam mŏ ‘meh vă yông hnam, hơdroong kon tơrong năm tơ̆ nai vă sơđơ̆ng, mă lei ưh kơ gơh:“Vơvĕr hlom lơ̆m teh hnam nhôn 70met, jrăng hơtăih kơ teh ŭnh hnam nhôn 10met, đơ̆ng hơdrơ̆ng truh tơ̆ hnam nhôn ‘noh 80met. Dang ei pơnăr vơvĕr krum hnam, mŭk drăm, jơhngơ̆m jăn ŭnh hnam nhôn. Kơna erih sa tơ̆ au jĭ tôch kơ hli hlơt, 2 sơnăm kơ au hlôi chih pơtruh hla bơar jơ̆p jang bơih”.

Kiơ̆ tơdrong tơchơ̆t đơ̆ng Hơnih tơm vei lăng mơdro sa tơ̆ chăl 2 Apăng 2, Tơdrong tơchơ̆t 02/2019/TT-BCT ‘nŏh “Hơnih tơ iung pơjing ŭnh hơyuh kial kăl hơtăih pơlei kon pơlei oei dang 300met”. Mă lei, dang ei, Hơnih tơm vei lăng Mơdro sa tim mă sơkơ̆t hơdăh găh tơdrong chă hrŭ ăn, tơgŭm ăn dôm yơ lơ̆m hơgăt teh 300met tơ̆ hơla vơvĕr ŭnh hơyuh kial. Tơdrong mă au pơm ăn tơdrong tơngla tơmơ̆t jên jang 16 tơdrong vă jang ŭnh hơyuh kial đei tơ iung pơjing sơnăm 2021 tơ̆ Gia Lai jei pơm kiơ̆ hrŭ ăn lăp hơtŏ 10% tơdrong tơchơ̆t hrŭ ăn păng tơgŭm djru pơjing hơnih oei ‘nao mưh teh đak iŏk tơvih teh đei tơchơ̆t tơ̆ chăl 2 Apăng 10 Tơdrong tơchơ̆t kơsô̆ 09/2018/QĐ-UBND năr 21-3-2018 kơ Hơnih vei lăng kon pơlei dêh char Gia Lai.

Yă Phan Thị Minh Phượng, kon pơlei đei hnam păng mŭk drăm lơ̆m pơkăp hrŭ 'mong lơ̆m anih pơkăp vă jang kơ Hnam kơmăi Unh hơyuh đơ̆ng Kial Ia Le 1 akhan, tơchơ̆t hrŭ  10% thoi noh ưh kơ tơgăl ôh:“Teh bơ̆ hnam inh noh 180 met vuông, hơdrong bơbe noh hloh 540 met vuông. Hăm tơchơ̆t tơgŭm 190 trĭu hlj noh hơkŏm tơ̆ yơ. Kơjă mă âu ưh kơ măh ăn unh hnam jăk oei tơ̆ anih nai. Mă âu jĭ anih hơdrô̆ kơ unh hnam, dang ei pơkăl kơjă hăm tơchơ̆t tơgăl vă tơdrong hơrih kon pơlei gơh sơđơ̆ng hloh”.

Pơngơ̆t kơ đon kơyoa tơdrong pơyoa tam mă đei vei sơđơ̆ng, rim unh ham tơ̆ tơring Ia Le, apŭng Chư Pưh hlôi lơ 'măng pơtruh hla bơ-ar tơkêng tơhlâu. Chih hơkŏm nơ̆r pơtruh đơ̆ng kon pơlei, Anih jang vei lăng kon pơlei dêh char Gia Lai hlôi đei hla bơ-ar pơtruh ăn Jơnŭm pơgơ̆r teh đak; Khul jang tang măt ăn Kuôk hô̆i dêh char chih hơkŏm nơ̆r tơgop, pơtruh hăm Kuôk hô̆i. Ăh tong anê̆ khei 4/2023, Kơdră Anih jang vei lăng kon pơlei dêh char Gia Lai akŏm pơma dơnuh hăm kon pơlei tơring Ia Le. Kơchĕng ăh jê̆ đĭ khei 5/2023, Anih jang vei lăng kon pơlei dêh char Gia Lai atŭm hăm rim anih jang kơpal kơ dêh char gô bơ̆ jang hăm anih jang mŭk drăm, vă chă trong sek tơlang pơkeh, vei sơđơ̆ng tơdrong pơyoa ăn kon pơlei.

Ƀok Nguyễn Minh Tứ - Kơ-iĕng Kơdră Anih jang vei lăng kon pơlei apŭng Chư Pưh, dêh char Gia Lai ăn tơbăt, lơ̆m kơplăh oei gô rim anih jang tơm, anih jang trung ương pơtruh hla bơ-ar pơtho, jơnŭm pơgơ̆r tơring pơtoi hơvơn kon pơlei, tang găn đei tơdrong tơkêng hơkŏm lơ bơngai, pơm tơsŭl tơsăl tơpôl tơ̆ tơring:“Đơ̆ng rŏng đei kon pơlei pơtruh nơ̆r, noh jơnŭm pơgơ̆r tơring hăt hot sek tơlang vă vei sơđơ̆ng tơdrong pơyoa ăn kon pơlei. Dang ei đei 17 unh hnam đei hnam oei, tơdrong jang oei tơ̆ hơla jrăng unh đơ̆ng kial, pơrăm truh tơdrong hơrih kon pơlei. Dêh char hlôi atŭm hăm apŭng lơ 'măng bơ̆ jang hăm anih jang mŭk drăm, pơtruh nơ̆r hăm trung ương đei trong sek tơlang tơdrong âu”

Adrol kơ noh, kon pơlei tơring Ia Pếch, apŭng Ia Grai, dêh char Gia Lai adoi akhan, dôm jrăng unh hơyuh đơ̆ng kial đei pơm jang, pơrăm truh tơdrong pơyua hăm 'long pơtăm. Hơdăh noh, hơbong pơchoh đak djăh kơ 2 jrăng unh hlôi pơm huach teh choh pơtăm kơ kon pơlei; jrăng unh hơyuh đơ̆ng kial ăh tơmơ̆t pơm jang noh lŭk lăk, gô pơrăm truh tơdrong hơrih kơ unh hnam kon pơlei eoi tơjê̆ noh. Kơyoa noh, athei tơgŭm yông 'nhăk kon pơlei truh oei ăh anih sơđơ̆ng, ataih đơ̆ng anih jang pơm tơlĕch unh hơyuh đơ̆ng kial. Kon pơlei tơ̆ minh ƀar tơring kơ apŭng Chư Prông, dêh char Gia Lai adoi mơmơnh găh tơdrong lŭk lăk đơ̆ng jrăng unh hơyuh đơ̆ng kial kơlih ƀŭ jrăng unh tơjê̆ hăm hnam oei kơ kon pơlei.

Anih jang Kŏng thương dêh char Gia Lai hlôi pơkăl Anih tơm Kŏng thương dăh đei hla bơ-ar pơtruh dăh mă kiơ̆ anih jang po vă tơlĕch tơchơ̆t hơdăh găh vei sơđơ̆ng tơdrong jang pơm tơlĕch unh hơyuh đơ̆ng kial păng hrŭ 'mong teh iŏk pơm jang, atŭm hăm mŭk drăm lơ̆m teh hơkŏm ƀŭ jrăng unh. Athei đei pơtho hơdăh găh hơgăt teh ƀơm hơkŏm iŏk, jô̆ hơlen tơdrong hrŭ, tơgŭm teh, hnam oei, tơmam drăm kăl, 'long pơtăm, hơdrong var kon tơrong... vă pơm anih tơm iŏk hơlen, tơgop pơm sơđơ̆ng tơpôl tơ̆ tơring mă đei pơkăp vă jang pơm tơlĕch unh hơyuh đơ̆ng kial lơ̆m tơring teh kơ dêh char Gia Lai.