6 khei blŭng sơnăm 2023, tơdrong jang mŭk drăm, tơpôl tơ̆ dêh char đei lơ tơdrong ‘lơ̆ng. Tơdrong jang tŏk mŭk drăm đơ̆ng dêh char dang 5,54%, jên tĕch tơmam tơ̆ tĕh đak đe pơhlom truh 420 triu USD, lơ̆m dêh char đei 490 anih tĕch mơdro ‘nao pơjing. Anih vei lăng kon pơlei dêh char hlôi kiơ̆ ăn trong jang tơmât jên ăn 15 tơdrong jang, akŏm đĭ đăng jên đei kĭ pơkăp truh 1.615 ti.

Tơ̆ hơnăp kơnh, vă pơm ‘lơ̆ng ăn tơdrong tơlĕch jên jang đơ̆ng tĕh đak, Anih vei lăng kon pơlei dêh char Gia Lai athei rim anih jang kơpal, tơring tơrang, tơ ‘ngla tơmât jên jang jăh pơm pơkĕh hla ar tơmât jên jang, hơtŏk hrĕnh tơdrong chưk pơ ‘ngoăih tĕh păng pơjing pơlei oei xa ‘nao vă đei tĕh rơgŏh pơjao ăn anih bơ̆ jang ming man; pơjing trong jang, chih hơgăt khei ‘năr bơ̆ jang mă hơdăh ăn rim tơdrong jang. Hơtŏk đon pơm kiơ̆ ki luơ̆t, sek tơlang tơpăt dôm bơngai pơm glăi, găn trong, pơm hiơ̆ hyĭn tơdrong tơlĕch jên jang đơ̆ng tĕh đak.