Kơ yuơ đei ƀơm đơ̆ng ‘mi pru tơ̆ Đak dơsĭ Hơlĕch, năr brei (25/9), tơ̆ lơ tơring kơ dêh char Gia Lai đei ‘mi tih. Vă pơm dă ƀiơ̆ đei răm đơ̆ng teh tơdrut hơlih, đak lơ̆p pơm ăn kơ yuơ đơ̆ng ‘mi tih, rim tơring, mă kăl rim apŭng găh hơlĕch, hơlĕch tu dêh char tŏk bŏk akŏm tơlĕch jang rim trong jang tang găn hơlau tơjră tang găn ‘mi kial hơbut hơbông.

Rim apŭng dêh char Gia Lai tôch hơmơt đei đak lơ̆p, đak lŏk jroh, teh tơdrut hơlih tơ̆ tơring groi kông păng đak lơ̆p lip tơ̆ tơring thŭng ‘noh: Apŭng KBang, Thĭ xah An Khê, apŭng Đak Đoa, apŭng Mang Yang, apŭng Ia Grai, apŭng Chư Păh, pơlei tơm Pleiku, apŭng Chư Prông, apŭng Đức Cơ, đơ̆ng năr au truh năr dơning, rim apŭng au hơnơ̆ng đei ‘mi păh ai, ‘mi tih păng đei tơring ‘mi tôch kơ tih. Vă tang găn hơlau păng pơm dă ƀiơ̆ hiong răm, Hơnih chĕp pơgơ̆r tang găn hơlau ‘mi kial hơbut hơbông pơrăm păng tơchă dŏng dêh char Gia Lai athei rim tơring hơmet khul bơ̆ jang năm dăr lăng, lăng hơlen rim pơlei pơla oei tơjê̆ thoong đak kroong, hơboong thoong đak, tơring thŭng vă tơlĕch jang hloi yông kon pơlei lĕch veh đơ̆ng hơnih hơmơt đak lip, đak lŏk jroh kơtang, teh tơdrŭt hơlih kơtang năm oei tơ̆ hơnih sơđơ̆ng.