Lơ̆m noh đei dôm hơnăp jang - trong jang tŭn pran tơlĕch jên tơmơ̆t jên jang teh đak. Kiơ̆ tơ roi tơbăt tơ̆ hop akŏm, tơdrong hơtŏk tơiung mŭk drăm kơ Gia Lai 6 khei âu ki đei 5,54% pơ ting hăm khei ‘nâu sơnăm hơdrol. Dôm tơdrong hơgăt găh akŏm thu mong jên jang teh đak, pơm tơlĕch kơmăy kơmŏk tŏk lơ; kơ sô̆ anih mơdro sa pơm hla ar bơ̆jang hơlơ̆k dơ̆ng păng kơ sô̆ tơdrong jang tơmơ̆t jên jang tŏk; tơdrong jang tơmang lăng đei tơplih ‘lơ̆ng.

Mă lei, lơ tơring tơ̆ Gia Lai kŭm tơƀơ̆p mơmat tat lơ̆m iŏk jên iŏk yua teh hơnhăk truh ưh kơ măh jên ăn dôm tơdrong jang tơmơ̆t jên jang, hiơ̆ kơ tơlĕch ăn trong vă jang iŏk yua teh; tơdrong tơlĕch jang dôm tơdrong jang tơm teh đak hiơ̆. Hơdrô̆ tơdrong jang tơmơ̆t jên jang teh đak, đĭ khei 6, dêh char ‘nao tơlĕch jên jang tam mă đei 14%. ‘Nâu kŭm jing tơdrong jang mă Anih vei lăng kon pơlei dêh char Gia Lai păng dôm anih jang kơ dêh char akŏm tơgŭm hơdrol hơmet pơ ‘lơ̆ng tơ̆ hơnăp kơnh. Anih vei lăng kon pơlei dêh char Gia Lai kŭm hlôi pơ jing 3 grŭp bơ̆jang vă hơtŏk hơlen lăng, hơmet pơ ‘lơ̆ng hloi dôm tơdrong đei ƀôh.