Dôm kơđông lĭnh vei lăng tơring sơlam găh Anih tơm pơgơ̆r ƀô̆ đô̆i vei lăng tơring sơlam dêh char Gia Lai hlôi pơjing trong tơlĕch jang vei lăng tơring sơlam teh đak ƀơ̆t hơdrol, lơ̆m păng đơ̆ng rŏng Tết Nguyên đán. Dôm anih jang bơ̆jang kiơ̆ băt hơdăh tơdrong lơ̆m teh đak, ‘ngoăih teh đak, tơring sơlam; pơgơ̆r pơtâp, pơhrăm dôm trong jang vei lăng tơring sơlam păng dôm trong tơlĕch jang dăr joang hơdrô̆, dăr joang 2 pang hăm khŭl lĭnh vei lăng tơring sơlam păih Campuchia.

Hơdai hăm ‘noh, dôm anih jang hơtŏk loi dơ̆ng pơhrăm dôm trong jang, bơ̆jang kiơ̆ trong jang ling lang iung tơblăh, ưh kơ lê̆ đei ƀôh tơdrong ưh kơ ê. Kŭm hăm ‘noh, khŭl lĭnh tơring sơlam hơtŏk băt hơdăh tơring, jang hơdai hăm khŭl lĭnh kơpal, khŭl kơdră tơring tơlĕch trong jang tang găn pơm glăi tơring sơlam; tơlĕch jang tơdrong jang đĭ đăng kon pơlei vang jang tơkêng pơm glăi, mă loi ‘noh jĭ pơm glăi tĕch mơdro ôn hơnơ̆ng bơ̆jang lơ̆m năr Têt.