Mir pơgar Đất Đỏ tơ̆ xah Cuôr Knia, apŭng Buôn Đôn să hloh 250 ha, hơtaih đơ̆ng tơring kon pơlei oei xa hloh 8 km. 'Nâu jing tơring jang kaphê, tiu, ƀa na kơ hloh 40 unh hnam kon pơlei lơ̆m xah. Vă năm truh tơring pơm jang, mă mônh noh kon pơlei năm kuanh trong truh xah Ea Bar dah mă năm gơng đak glung Nước Trong. Trong kuanh xah Ea Bar hơtaih hloh 2 'măng, oei năm kiơ̆ gơng nơh ưh đei sơđơ̆ng. 'Nâu jing gơng man bê tông đei kon pơlei kơdih tơgop ming man đơ̆ng sơnăm 2005. Drơh gơng să 2 met, đei pĕng 2 pah noh đei ƀôh hơđăng, pơchah; jrăng gơng noh tơhlŭn. Vă vih vơ̆t tơdăng, kon pơlei iŏk 'long tih vă jră gah drơh gơng hoai kơ hlŭn. Ƀok Nông Ngọc Quyết, bơngai jang mir oei tơ̆ thôn Ea Kning, xah Ea Bar apŭng Buôn Đôn đei 1,5 ha teh pơm jang tơ̆ âu tơroi: “Lơ̆m tơring âu teh choh jang noh lơ, mă lei trong nơnăm tơnap tap, mă kăl noh rok kiơ̆ gơng. Gơng âu dang ei ưh khĭn chơ trăp ôh”

Buôn Đôn jing minh lơ̆m ƀar apŭng sơlam teh kơ dêh char Đak Lăk. Tơdrong hơrih kon pơlei mă tơm noh gơnơm lơ̆m choh jang xa. Lơ tơring choh jang trong nơnăm tơnap tap. Kiơ̆ kơ ƀok Bùi Văn Vinh – Kơdră Anih jang Mŭk drăm ming man anih pơm jang apŭng Buôn Đôn, noh đơ̆ng chă hơlen lơ̆m apŭng đei 12 tŏ gơng vih vơ̆t lơ̆m tơring kon pơlei kăl đei ming man vă gơh sơđơ̆ng. 4 sơnăm hơdrol ki, iŏk jên tơgŭm đơ̆ng Anih tơm jang gah trong nơnăm Việt Nam, apŭng hlôi man đei 2 tŏ gơng kơjăp tơ̆ dôm xah Ea Huar păng Ea Wer, kơsô̆ jên huach 24 tih hlj. 10 tŏ gơng nai kăl pơhlom 35 tih hlj ming man noh tam mă đei asong. Ƀok Bùi Văn Vinh ăn tơbăt: “Apŭng hlôi pơtruh nơ̆r hăm Trung ương, dêh char tơgŭm hơmet rim tŏ gơng pơhlom đơ̆ng 300 truh 400 trĭu hlj vă ming hơmet mă kơjăp, 'măn ăn kon pơlei vih vơ̆t sơđơ̆ng, chơ pơdŭ tơmam drăm ƀônh hiôk hloh, hŏk tro năm hŏk sơđơ̆ng hloh lơ̆m pơyan 'mi kial”  

Hăm dêh char groi kông, teh să, lơ đak krong đak glung, dêh char Đak Lăk kăl ming man lơ gơng vih vơ̆t hloh lơ̆m tơring kon pơlei oei jang xa. Đơ̆ng sơnăm 2016 – 2022, iŏk jên tơgŭm đơ̆ng Anih tơm trong nơnăm Việt Nam păng Anih jang gah kon pơlei Kon kông, dêh char hlôi man đei 97 tŏ gơng vih vơ̆t ăn kon pơlei hăm kơjă 200 tih hlj, tơ̆ dôm xah tơring I, II păng III lơ̆m dôm apŭng hơtaih yaih. Ƀok Lê Công Du – Phŏ Kơdră Anih jang gah trong nơnăm pơdŭ tơmam drăm dêh char Đak Lăk ăn tơbăt, jơ̆p dêh char dang ei oei 210 tŏ gơng vih vơ̆t hlôi hư, athei ming hơmet dah mă tơplih 'nao hloi, kơsô̆ jên huach pơhlom 400 tih hlj:  “Jên ming man noh kăl lơ, lơ̆m kơplah tơdrogn asong jang đơ̆ng dêh char ưh đei lơ, nhôn adoi pơtruh nơ̆r apinh chă tơgŭm đơ̆ng Trung ương asong ăn dêh char Đak Lăk dah hrôih asong ming man gơng hlôi hư. Kiơ̆ đơ̆ng noh tơgŭm ăn kon pơlei vih vơ̆t, chơ tơmam drăm sơđơ̆ng hloh”

Vih vơ̆t rok kiơ̆ gơng so ưh kơjăp, noh hli hlơt tơpă, mă lei kơyuơ tơdrong hơrih xa kon pơlei tơ̆ tơring hơtaih yaih kơ dêh char Đak Lăk adoi oei rok găn rim năr.