Phó Thủ tướng Trần Hồng Hà, kơdră chĕp kơ̆l pơgơ̆r Khul hơpơi ‘mĕh kiơ̆ đơ̆ng dôm tơdrong đei tơ̆ yăn âu, dôm tơring vang tơgop nơ̆r păng tơblang hơdăh dôm tơdrong hlôi hơnhăk ba tơdrong jơnei lơ̆m jăl jang âu ki, pơma tơlĕch dôm tơdrong jang kăl athei bơ̆ jang lơ̆m 5 sơnăm truh.

Khul chih hơmet hla ar găh mŭk drăm, tơpôl ăn Hop akŏm mă XIV kơ Đảng vă mơ̆ng, chih răk tôm nơ̆r pơma đơ̆ng tơring găh hơnăn tơring, tơmam tơ̆ tơring, tơdrong pran ‘lơ̆ng, đei yoa, dôm tơdrong pha ra băl tơ̆ tơring. Hơdai hăm ‘nŏh jĭ dôm tơdrong kăl păng trong jang vă tơguăt tơring, dôm tơdrong tơchĕng, đon pơcheh gĭt kăl vă Khul chih hơmet hla ar găh mŭk drăm, tơpôl chih iŏk, tơchĕng hơlen păng chih pơjing Hla ar kăl ăn Hop akŏm Đảng lơ̆m teh đak ‘măng mă XIV lăp hăm tơdrong ‘mĕh vă tơ̆ yăn âu lơ̆m tơdrong arih.