Pơma tơ̆ Tơdrong jŏh hơri hơxoang “Groi tĕh tôch sĭt Đồng Lộc – trong yak rơbâu sơnăm” pơgơ̆r ƀât hơtuch giĕng âu ki, tơ̆ Anih gru groa Trong tơklăh 3 Đồng Lộc, Phŏ Kơdră tĕh đak Võ Thị Ánh Xuân hơpơi ‘mĕh “Đảng ƀô̆, Khul kơdră pơgơ̆r, khul linh păng kon pơlei dêh char Hà Tĩnh jang ‘lơ̆ng hlŏh dơ̆ng tơdrong jang tơgŭm ăn bơngai đei kŏng hăm kăch mang; tưk tơiung tơdrong jŏh ayŏ kơ dŏ xoang, kơtang nuih mơng đơ̆ng pơlei kăch mang, tưk tơiung jơhngâm đon hơpơi ‘mĕh kơ kon bơngai Hà Tĩnh, hơnơ̆ng chih tơlĕch dôm tơdrong gĭt kăl đei ư hơnhang kơ Kông Hồng Sông La lơ̆m chăl ‘nao”.

Lơ̆m tơdrong hơri hơxoang “Groi tĕh tôch sĭt Đồng Lộc – trong yak rơbâu sơnăm” yoa Ƀăo Nhân dân, Trung ương Đoàn TNCS Hồ Chí Minh păng dêh char Hà Tĩnh vang pơgơ̆r. Tơdrong jŏh hơri đei 3 jăl, tơgŭm ăn bơngai mơ̆ng, lăng đei arih dơ̆ng lơ̆m chăl iung tơblăh tôch kơtang sơ̆. Tơdrong hơri đei tơƀôh đon tơchĕng; đon hơpơi ‘mĕh đơ̆ng jơhnơr mơlôh chu năm tơblăh, lôch tang yoa tơdrong rơngei, pơjing đei 1 tĕh đak kơjăp ‘lơ̆ng, kŭm nhen đon pơhnŏng đơ̆ng jơhnơr hrei ‘nâu khŏm tơiung pơjing tĕh đak pran kơtang, hơnŭk hơnoa.