Tơdrong jang tơmơ̆t jên jang ming man trong gre kơdâu hrĕnh Khánh Hòa - Buôn Ma Thuột đei kơ jung hloh 117 km. Lơ̆m noh, trong năm klĕch dêh char Khánh Hòa kơjung 32,7km, hăm akŏp kơ sô̆ jên tơmơ̆t jang hloh 5.600 ti hlak jên. Tơdrong jang đei tơlĕch jang đơ̆ng tŏk bŏk khei 6/2023, tơchĕng hơdrol iŏk jang lơ̆m sơnăm 2026. 

Dôm anih jang iŏk jang tŏk bŏk sir ƀŭ tơ̆ dôm hơnih hlôi đei pơjao teh. Truh dang ei, jên tơmơ̆t jang teh đak bơ̆jang tơdrong jang pơm trong klĕch dêh char  Khánh Hòa hlôi tơlĕch jên jang đei 71,8% trong tơlĕch jang sơnăm 2023. Vă tơlĕch jang tơdrong jang, kăl kơ hơgăt teh pơdreo dang 230 héc ta hăm 970 ‘nu bơngai đei ƀơm ưh kơ ‘lơ̆ng. Tơdrong jang kŭm đei vă jê̆ 23 héc ta teh bri kăl kơ tơplih đơ̆ng teh bri jing teh nai vă bơ̆jang tơdrong jang.