Ƀơ̆t lơ̆m gơ măng 19/7, Anih pơre nơ̆r păng pơdăh ti vi Nhật Bản NHK pơih pơre 1 ƀai tơroi đunh jơ, lơ̆m noh tơroi hơdăh dôm tơdrong tơgop đơ̆ng Tổng bí thư Nguyễn Phú Trọng hăm tơdrong jang pơjing, vei lăng păng hơtŏk tơiung teh đak Việt Nam kŭm hăm dôm tơdrong tơgop gĭt kăl lơ̆m tơdrong pơvei jang tơbôl hăm rim teh đak đei pơđĭ hloi Nhật Bản. Tơdrong tơroi âu iŏk yua dôm rup, hla ar kăp gĭt găh Tổng bí thư nhen: tơdrong đei măt đơ̆ng Tổng bí thư tơ̆ dôm hop akŏm tih, ‘măng tơƀơ̆p hăm Kơdră tơm teh đak Mi Joe Biden, pơma đam hăm Tổng bí thư - Kơdră teh đak Trung Quốc Tập Cận Bình, pơma dơnuh hăm Thủ tướng Nhật Bản Abe Shinzo…

Ƀai tơroi hơdăh: “Tổng bí thư Nguyễn Phú Trọng jĭ bơngai chĕp kơ̆l tih, đĭ yak hloh lơ kơchư̆k jang gĭt kăl. Ƀok jĭ bơngai pơtrŭt pran kơtang tơdrong jang tang găn sa pơ gơ̆m pơ jĭp kơ Việt Nam, sek phak kơ hret jô̆ hloi dôm kang ƀô̆ gĭt kăl lơ̆m khŭl jang chĭnh trĭ. Găh jang tơbôl, lơ̆m khei ‘năr apŭng plĕnh teh tŏk bŏk ƀrư̆ ƀrư̆ klăih song jing 2 trong, ƀok oei pơvei tơdrong jang tơgŭm tơbôl pơih să, lơ trong, pơm ‘lơ̆ng lơ tơdrong pơvei jang tơbôl, tơƀôh ‘meh vă pơm buăl hăm đĭ đăng rim teh đak păng tơring lơ̆m apŭng plĕnh teh. Găh tơdrong pơvei hăm Nhật Bản, ƀai chih tơroi tơƀlŏk dơ̆ng ‘măng tơƀơ̆p đơ̆ng Tổng bí thư hăm Thủ tướng Abe Shinzo. Đơ̆ng noh, 2 kơdră chĕp kơ̆l sơkơ̆t hơdăh 1 ‘măng dơ̆ng gô hơnơ̆ng pơih să pơvei jang hơdai 2 pang. Hla ar chih tơroi mŭk drăm Nhật Bản (Nikkei) kŭm chih tơroi dôm tơdrong kơtơ̆ng ang lei lăi NHK mă lei tơroi dơ̆ng dôm tơdrong tơgop đơ̆ng Tổng bí thư ăn tơdrong jang hơtŏk tơiung mŭk drăm kơ Việt Nam, lơ̆m noh tơroi hơdăh trong jang tơgŭm ƀơm truh Việt Nam kĭ pơkăp tơdrong tơchơ̆t mơdro sa hiôk hian hăm lơ teh đak păng sơkơ̆t hơdăh: “Tổng bí thư jĭ bơngai pơm ăn mŭk drăm Việt Nam hơtŏk tơiung pran kơtang”.