Lơ̆m 2 năr, ‘năr 12 păng 13/12, dôm tơdrong kơtơ̆ng ang găh ‘măng ngôi tơ̆ teh đak Việt Nam đơ̆ng Tổng Bí thư, Kơdră Tập Cận Bình ƀĕnh tơ̆ dôm hla ar kơtơ̆ng ang păng lơ̆m mạng Trung Quốc. Um rup kon pơlei Việt Nam kơkuh sơng Kơdră chĕp kơ̆l teh đak Trung Quốc, lêh sơng, pơma đam, nhă đak hla che, mă loi ‘noh jĭ Tổng Bí thư Nguyễn Phú Trọng asong păng roi tơƀôh tơmam ‘noh jĭ 1 rum rup phĭn găh 2 ‘nu huch hla che tơ̆ Bắc Kinh lơ̆m ‘măng năm ngôi, bơ̆jang hơtuch sơnăm 2022 ăn Tổng Bí thư, Kơdră Tập Cận Bình hlôi đei akŏm tăh lơ̆m mạng păng kon pơlei mạng vang tăh tơƀôh jơ̆p jang. Lơ̆m tơdrong kơtơ̆ng ang tơ̆ Tân Hoa xã păng Kon pơlei hla ar tơroi rim năr, Tổng Bí Thư Tập Cận Bình pơma hơdăh dơ̆ng, “Tơdrong pơvei ‘lơ̆ng hơiă Việt - Hoa, jing buăl joăt hai, jing ‘nhŏng oh hai” jĭ um rup ‘lơ̆ng hơiă hloh găh tơdrong pơvei Việt – Trung.

Trung Quốc ling lang lăng tơdrong pơvei Việt – Trung đơ̆ng tơdrong gĭt kăl păng đunh đai. Ƀok lui ngeh akhan, hăm dôm tơdrong hơdrin atŭm đơ̆ng pơđĭ 2 păh, tơdrong pơvei 2 teh đak gô yak mơ̆t lơ̆m 1 jăl jang ‘nao hăm lui ngeh chĭnh trĭ ‘lơ̆ng hloh, jang hơdai sơđơ̆ng tơ pă hloh. Tơdrong jang pơjing chủ nghĩa xã hội đơ̆ng 2 teh đak hơnơ̆ng iŏk đei dôm jơnei ‘nao păng đei dôm tơdrong tơgop ‘nao lơ̆m tơdrong sơđơ̆ng, hơtŏk tơiung păng hơnŭk hơnoa kơ tơring păng apŭng plĕnh teh.