Kơdră Kuô̆k hô̆i Vương Đình Huệ pơma hơdăh, hlŏh 98 sơnăm pơjing păng jang tŏk, Hla ar tơroi kăch mang Việt Nam yoa Ƀok Hô pơjing păng chĕp kơ̆l pơgơ̆r hơnơ̆ng yak hơdoi lơ̆m rim jăl trong iung tơblăh đơ̆ng kăch mang, tơgop gĭt kăl lơ̆m tơdrong tơiung pơjing păng vei lăng tĕh đak. Hăm tơdrong pơgơ̆r đơ̆ng Đảng, tơdrong chih hla ar tơroi kăch mang Việt Nam hơnơ̆ng tŏk pran găh rim tơdrong, chih roi gơ̆h hơgei, đei anih dơ̆ng roi kơjung. Rim jơhnơr bơngai chih hla ar tơroi lơ̆m tĕh đei hơmet pơ ‘lơ̆ng, jang roi gơ̆h păng tôch tơgăl hăm hơdrĕch hơdrung, mât jang hơdoi tôch sơđơ̆ng, đei lơ um ai ‘lơ̆ng hơiă lơ̆m khei ‘năr jang tŏk đơ̆ng Hla ar tơroi păng tơdrong tơroi tơbăt kơ apŭng plenh tĕh. Đĭ đăng vang tơgop tơƀôh hơdăh, pôk pơ ư anih dơ̆ng, jơhngâm pran păng bưng ai Việt Nam:

“Inh pôk pơ ư păng tôch hơiă hăm dôm bơngai chih hla ar tơroi lơ̆m tĕh đak hlôi adrin jang đei lơ tơdrong jơnei tih tên. Mă loi, inh tơchĕng ‘lơ̆ng tơdrong tơgop đơ̆ng dôm bơngai chĕp kơ̆l, pơgơ̆r, vei lăng hla ar tơroi hlôi jang đang ‘lơ̆ng tơdrong jang, pơjing tơdrong hiôk hian ăn vă hla ar tơroi jang tŏk roi đunh roi pran, pơm pơ ‘lơ̆ng ăn hla ar tơroi kăch mang, tơgop gĭt kăl ăn tơdrong jang tơplih ‘nao păng mât hơdoi hăm apŭng plenh tĕh đơ̆ng tĕh đak bơ̆n. Inh pơma hơdăh dơ̆ng tơdrong tơgop tih tên đơ̆ng rim khul chih hla ar tơroi Việt Nam đơ̆ng Trung ương truh tơ̆ tơring lơ̆m 73 sơnăm âu ki hơnơ̆ng pơih xă khul chih, vei kơjăp tơdrong pơvei, pơtho pơhrăm ming păng vei lăng tơdrong gơ̆h jang păng tơdrong đei yoa tôch tơgăl đơ̆ng rim bơngai jang”.

Kŭm ƀlep ƀât tơbăt 98 sơnăm Năr Hla ar tơroi kăch mang Việt Nam, Kơdră chĕp kơ̆l Ban Tuyên giáo Trung ương Nguyễn Trọng Nghĩa pơgơ̆r tơƀâp, bơ̆ jang hăm kơdră chĕp kơ̆l dôm anih chih hla ar tơroi chinh trĭ tơm dơnơm. Kơdră chĕp kơ̆l Ban Tuyên giáo Trung ương ăn tơbăt, 12 anih chih hla ar tơroi chinh trĭ tơm adrin tơlĕch jang tôch ai tơdrong pơtho pơhrăm ăn bơngai chih tơdrong kơtơ̆ng ang, bơngai chih hơmet, kăn ƀô̆, bơngai chih hla ar tơroi găh đon hlôh vao chinh trĭ păng tơdrong chih hla ar, bơ̆ jang chih hla ar tơroi hăm kơmăy sô̆, tơpă jĭ dôm anih chih hla ar tơroi năm hơdrol, chih tơroi tơpăt ‘lơ̆ng, jang tơnăp lơ̆m tơdrong pơjing trong chih hla ar tơroi...

Kơdră chĕp kơ̆l Ban Tuyên giáo Trung ương Nguyễn Trọng Nghĩa pơma hơdăh: “Năr hla ar tơroi kăch mang sơnăm ‘nâu, bơ̆n lăng dơ̆ng 2 sơnăm 1 puăt bơ̆ jang kiơ̆ Tơdrong tơchơ̆t đơ̆ng Hop akŏm mă 13 kơ Đảng –tŏk bŏk jăl jang păng trong vă pơgơ̆r dôm tơdrong tơbăt 100 sơnăm Năr hla ar tơroi kăch mang athei pơgơ̆r mă ‘lơ̆ng. Kiơ̆ kơ ‘nŏh, athei hơlen nanwg rim tơdrong jang tơm lơ̆m 2 sơnăm 1 puăt, tŏk bŏk jăl jang bơ̆ jang kiơ̆ tơdrong tơchơ̆t đơ̆ng Hop akŏm ‘măng mă 13 lơ̆m tơdrong chih hla ar tơroi, akŏm lơ̆m dôm anih chih hla ar tơroi tơm dơnơm đơ̆ng Đảng, đơ̆ng Khul kơdră tĕh đak, đơ̆ng anih chĕp kơ̆l đảng, khul kơdră pơgơ̆r tơring”.

‘Năr 21/6, ‘nŏh jĭ năr chơt hơiă kơ dôm bơngai chih hla ar tơroi kăch mang lơ̆m tĕh đak. Tơ̆ Anih tơm Hà Nội, gơmăng ‘năr 21/6, pơgơ̆r lêh Hơpăh tơmam ăn bơngai chih hla ar tơroi rơgei lơ̆m tĕh đak ‘măng mă 17 sơnăm 2022, hăm 124 ƀai chih rơgei hlŏh đơ̆ng dôm bơngai chih, khul grŭp chih hơdoi đei pôk pơ ư. ‘Măng thi mă âu đei hlŏh 1.890 ƀai chih vang thi, đei 157 ƀai mât lơ̆m vŏng hơtuch, Khul châm hơlen hlôi rơih đei 124 ƀai chih rơgei hlŏh vă hơpăh tơmam, đei 9 yaih A, 24 yaih B, 46 yaih C, 45 yaih pơ čhơp jơhngâm.

Kiơ̆ tơdrong tơchĕng đơ̆ng Khul châm hơlen, dôm ƀai chih vang thi chih ‘moi kiơ̆ lơ tơdrong tih đơ̆ng chinh trĭ, mŭk drăm, jŏh ayŏ kơ dŏ xoang, tơpôl, khul linh, vei sơđơ̆ng tĕh đak păng lơ tơdrong nai ƀơm truh tơdrong arih xa lơ̆m tĕh đak sơnăm 2022, roi tơƀôh tôch hơdăh lơ tơdrong gĭt kăl kơ tĕh đak. Yă Đỗ Thị Thu Hằng, Kơdră vei lăng tơdrong jang lơ̆m Khul chih hla ar tơroi Việt Nam, Phŏ Kơdră Khul châm hơlen blŭng a kơ Tơdrong thi chih hla ar tơroi lơ̆m tĕh đak ‘măng mă 17 ăn tơbăt:

“Dôm ƀai chih vang thi sơnăm ‘nâu tôch ‘lơ̆ng. Vă rim ƀai chih ‘moi kiơ̆ rim tơdrong tơ̆ yăn âu, tôch hơiă, chih tơroi hơdăh dôm tơdrong tơtŏ lơ̆m sơnăm 2022 găh dôm tơdrong jang chinh trĭ, mŭk drăm, tơpôl, vei sơđơ̆ng tĕh đak, tơiung pơjing Đảng... Lơ ƀai chih đei chih tôch hơlen, chih tơroi dôm tơdrong ‘nao, tơblang tơƀôh dôm trong jang, tơdrong tơgŭm tih đơ̆ng Đảng, tĕh đak; tơlĕch lơ trong jang ‘lơ̆ng, trong jang hơiă vă pôk pơ ư, ƀơm ‘lơ̆ng lơ̆m tơpôl. Lơ ƀai chih tôch ‘lơ̆ng, đei chih tôch hơlen, chih nơ̆r kơjăp ‘lơ̆ng, chih tơroi tôch hơiă, pơm ăn lơ bơngai ‘mĕh đŏk lăng”.

Tơdrong ‘nao lơ̆m ‘măng thi mă âu ‘nŏh, hơdai hăm dôm anih chih tơdrong kơtơ̆ng ang Trung ương, anih chih hla ar tơroi tơ̆ tơring hlôi tơƀôh hơdăh tơdrong jơnei đơ̆ng tơplih ‘nao gơ̆h hơgei, đei lơ kơloăi hla ar tơroi hăm kơmăy kơ mŏk ‘nao. Lơ Khul chih hla ar tơroi dêh char hŭt lơ jơnăr chă rơih, chih hơmet pơ ‘lơ̆ng lơ ƀai chih vă gơih thi. Lơ̆m Tơdrong thi chih hla ar tơroi lơ̆m tĕh đak ‘măng mă 17 sơnăm 2022, tơdrong roi tơbăt hăm rup đei lơ rup phĭn vang thi ‘lơ̆ng ƀiơ̆ kơ dôm sơnăm âu ki, mă loi jĭ tơ̆ 1,2 anih jang păng tơring đei ƀôh đe hŭt lơ jơnăr phĭn, chih hơmet ƀai thi, rup, đei lơ rup, phĭn kiơ̆ tơdrong đei tơ̆ yăn âu, bơngai phĭn hơmet rup tôch hơgei.