Kơtơ̆ng ang lơ̆m tơring tơroi hơdah kơ tơdrong kăp gĭt ăn ‘măng năm tơmang đơ̆ng ƀok Thủ tướng Phạm Minh Chính truh 3 teh đak lơ̆m tơring, lơ̆m noh sơkơ̆t hơdah UAE, Saudi Arabia păng Qatar jing dôm teh đak jang hadoi kăp gĭt, đunh khei năr păng tôm tơdrong hăm Việt Nam lơ̆m lơ tơdrong jang. Kơtơ̆ng ang UAE ră hơdah kơ dôm tơdrong đei iŏk jơnei lơ̆m ‘măng năm tơmang, mă kăl noh tơdrong mă Việt Nam păng UAE drơ̆ng nơ̆r hơtŏk tơdrong jang tơbôl 2 pah jing Tơdrong jang hadoi tôm tơdrong, kĭ pơkăp Tơchơ̆t jang Hadoi mŭk drăm tôm tong Việt Nam - UAE. 

Tơ̆ teh đak Saudi Arabia, kơtơ̆ng ang chih tơbang gah tơdrong hơtŏk jang tơbôl kơ 2 teh đak; tơrĕk hloh noh tơdrong pơma đam đơ̆ng Thủ tướng Phạm Minh Chính păng Thủ tướng teh đak Saudi Arabia Mohammed Bin Salman. Tơ̆ teh đak Qatar, kơtơ̆ng ang chih tơbang gah dôm tơdrong pơma đam đơ̆ng Thủ tướng Phạm Minh Chính hăm Ƀok pơtao, Thủ tướng păng Kơdră Kuôk hô̆i teh đak âu.