Đe hŏk tro gô pơm ƀai pơlong lơ̆m 2 năr, ‘năr 27 păng 28/6 ‘noh đei 3 ƀai pơlong hơdrô̆ Toán, Ngữ văn, Nơ̆r teh đak đe păng 1 ƀai pơlong akŏm Khoa học tự nhiên, dăh mă Khoa học xã hội.

Kiơ̆ kơ ƀok Huỳnh Văn Chương, Kơdră Anih jang hơlen lăng tơdrong ‘lơ̆ng, Anih tơm vei lăng găh pơtho pơhrăm, Phŏ Kơdră Khŭl chĕp kơ̆l pơgơ̆r Anih pơgơ̆r jang teh đak ‘Măng pơlong tốt nghiệp hŏk jăl 3 sơnăm 2024, rim tơdrong jang hơmet ăn găh tơmam, bơngai jang pơvih pơvăn ăn ‘măng pơlong hlôi đei rim tơring jang đang, vă jê̆ 2.300 hơnih pơlong hlôi hơmet tôm sơng hŏk tro truh pơm hla ar vang pơlong. ‘Măng pơlong tốt nghiệp hŏk jăl 3 sơnăm 2024 jĭ ‘măng pơlong đei tơdrong ‘lơ̆ng gĭt kăl ƀơ̆t jing sơnăm hŏk tuch luch păng pơlong kiơ̆ Tơdrong pơhrăm phổ thông 2006.