Lơ̆m năr hŏk tro năm tơ̆ hnam trương, lơ dêh char lơ̆m tơring nhen Sơn La, Yên Bái, Lai Châu... đei ‘mi, mă lei hoei pơm kơnê̆ truh tơdrong chă yơ yak kơ đe oh. Hơdrô̆ dêh char Sơn La, tơ̆ til pơgê, jơ̆p tơring jei đei ‘mi tih, tơdrong chă yak jei mơmat tat, mă lei hăm tơdrong tơgŭm djru đơ̆ng khul bơ̆ jang, kơna năr mơ̆t hŏk kơ rim đe oh đei sơđơ̆ng lơ̆m jơhngơ̆m đon chơt hơ iă ‘nă hal kơ pơđĭ ƀok thây kô păng hŏk tro.

Hơdrol atŭm hăm rim hŏk tro lơ̆m teh đak pơm lêh mơ̆t hŏk sơnăm hŏk ‘nao lơ̆m năr 5/9, hŏk tro kơ rim hnam trương tơ̆ Tây Bắc gô đei 1 giĕng chă pơhrăm tơdrong joăt, vang hơpuih hơmet pơ ‘lơ̆ng hnam trương lăm hŏk. Rim ƀok thây kô ‘noh jĭ dôm bơngai chă pơtho ăn đe oh vă đe oh joăt hăm jơ ‘năr hok pơhrăm đơ̆ng rŏng khei ‘năr pơdơ̆h hŏk, hơmet ăn mĭnh sơnăm hŏk ‘nao gô iŏk đei jơnei hơ iă hloh.