Hơlih, tơhlŭn, pơchah hư răm noh jing tơdrong đei ƀôh tơ̆ thong hơbong đak ah jăl gah hlĕch, hơtaih jê̆ 10 km, pơchoh đak đơ̆ng dơnâu Ea Sup vă vih truh xah Ea Bung, apŭng Ea Súp.

Lơ jăl bê tông tơhlŭn jing hơlŭng tih să, pơnơ̆t noh hơlih. ‘Nhŏng Nguyễn Văn Phú, unh hnam đei  8 sao ƀa na tơjê̆ hơbong đak âu ah hơtuch thôn 5, xah Ea Bung ăn tơbăt, minh ƀar sơnăm tơjê̆ âu, đak ưh đei sơđơ̆ng noh plei ƀa tơjur hloh 30%, kon pơlei jang xa ưh đei yua lơ ôh: “Hơbong đak pơchah đang kơ noh hrơm đak, noh đak pơchoh truh ah anih tôch thôn 5 noh ưh kơ mah ôh. Vă pơm jang sơđơ̆ng noh kon pơlei athei sir kuai hơlŭng đak, chă ƀôm đak pơchoh ăn na ƀa tơ̆ dôm đak glung oei đei đak. Jên asong jang tôch kăp kơlih kơjă phŏng rei kăp kơ jên, unh hơyuh tŏk kăp, kon pơlei jang ƀa ưh kơ đei yua lơ ôh”.  

Xah Ea Bung, apŭng Ea Súp đei hloh 1.000 ha ƀa đei ruih đơ̆ng thong hơbong đak gah hlĕch. Mă lei đơ̆ng rŏng dôm jĭt sơnăm iŏk yua, ưh hơdrô̆ 10 km hơbong đak tơm, mă tôm thong hơbong đak găn tơring teh kơ xah, adoi hlôi hư răm kơtang, pơm ăn jang ƀa lơ̆m xah ƀơm răm. Ƀok Lê Hồng Hạnh – Ƀĭ thư Đảng ủy Ea Bung ăn tơbăt, tơring hlôi pơtruh nơ̆r hăm Anih jang vei lăng kon pơlei dêh char asong jên ming hơmet: “Thong hơbong đak âu pơchoh truh mir na tôch adar, đei lơ hơnih ưh đei đak ro truh, pơrăm tih tên truh tơdrong jang rei pơtăm. Nhôn pơtruh nơ̆r păng hơpơi ‘meh Anih jang vei lăng kon pơlei dêh char asong jên ming man thong hơbong đak vă pơm thoi yơ gơh pơchoh đak vih tơtom hăm dôm hơgăt rei pơtăm ƀa kơ kon pơlei lơ̆m xah, vă pơm thoi yơ ƀa gơh đei plei pơyua lơ hloh” 

Ea Súp jing tơring dơnơm jang ƀa kơ dêh char Đăk Lăk, đei dơnâu mong đak tih hloh dêh char atŭm hăm thong hơbong đak hơtaih jê̆ 105 km, ‘măn ruih ăn 8.210 ha ‘long pơtăm; Asong đak sŏ nhă ăn pơhlom 20.000 măt kon pơlei. Mă lei, kiơ̆ kơ ƀok Trịnh Quốc Bảo – Phŏ Kơdră Kŏng ti Vei lăng Thong Pơnơ̆t đak dêh char Đăk Lăk, thong hơbong đak âu tŏk bŏk oei ƀơm răm hăm lơ anih hơlih, teh tơhlŭn, rơđăng pơchah. Tơ̆ dôm anih nai, bê tông adoi hlôi jô păng hrơm đak. Rim sơnăm, kŏng ti đei asong ăn hloh 1 tih hlj vă tơlĕch ming hơmet. Lơ̆m sơnăm 2023, đei Anih jang vei lăng kon pơlei dêh char Đăk Lăk tơgŭm ăn hloh 10 tih hlj đơ̆ng Jên Mong tang găn păng tơjră tŏ ‘mi kial pơrăm kơ dêh char, ‘măn ăn tơdrong chă ming hơmet dôm anih hư răm, hơlih tơhlŭn kơtang... Mă lei kơsô̆ jên âu ưh kơ mah vă hơmet ăn tôm anih răm tơ̆ rim thong hơbong đak. Ƀok Bảo akhan, vă ming hơmet gơh tơnăp jơnei, noh gô kăl lơ kon jên hloh: “Vă hơmet ming tih, dah mă hơmet dôm anih hư răm tơ̆ tôm thong hơbong đak noh gơnơm jên tơgŭm đơ̆ng Teh đak, vă hơmet ming noh adoi huach hloh kơ 100 tih hlj pơtơm mah. Jên đei iŏk đơ̆ng jên yua thong hơbong đak, tơgŭm tang găn păng tơjră tŏ ‘mi kial pơrăm noh ưh kơ mah ôh”

Dêh char Đăk Lăk dang ei đei jê̆  620 dơnâu mong pơnơ̆t đak kĕ mong hloh 650 trĭu m3 đak; 161 dơnâu mong đak, 76 anih ƀôm đak, păng 2 hơbong đak. Lơ̆m noh, lơ pơnơ̆t đak hlôi hư răm, pơrăm truh dơnâu mong đak, mă kăl noh ưh kơ ‘lơ̆ng hăm tơdrong pơchoh đak ‘măn ruih ăn ‘long pơtăm. Lơ dơnâu mong, pơnơ̆t đak tơ̆ dêh char Đăk Lăk ƀơm hư răm, pơrăm truh dôm jĭt tih hlj. Kiơ̆ đơ̆ng chă hơlen sơkơ̆t noh dang ei đei 57 thong hơbong đak ưh đei sơđơ̆ng. Chŏng mă, tơdrong chă ming hơmet tŏk bŏk oei ƀơm tơnap tap kơlih tam mă đei asong jên ming man.

Tơ̆ apŭng Ea Súp truh dang ei, kon pơlei jang mir hlôi kăt yua đang ƀa pơyan puih phang, hơmet choh teh, rei pơtăm ƀa pơyan sơnăm 2024. Hăm thong hơbong đak tam mă đei hơmet ming, noh kơ rơbâu ha ƀa kơ kon pơlei tơ̆ tơring âu hơbŏ gô pơtoi ƀơm răm ƀa ưh đei plei kơlih ưh kơ mah đak pơchoh ăn kơ na ƀa.