Tơdrong tơgŭm pơyan thi sơnăm ‘nâu đei tơlĕch đơ̆ng blŭng khei 4 truh đĭ khei 7 hăm lơ tơdrong jang tơgŭm, yak hơdoi hăm hŏk tro, bơngai năm thi adrol, lơ̆m păng đơ̆ng rŏng kơ thi tốt nghiệp THPT. Truh dang ei, lơ̆m dêh char pơjing đei 33 khul jang tơgŭm tơ̆ dêh char păng apŭng, hăm hlŏh 1.000 ‘nu bơngai vang jang.

Kiơ̆ kơ ‘nŏh, rim khul đei tơdrong jang pha ra băl nhen: Khul jang tơgŭm hăm kơmăy sô̆ vang tơgŭm lơ̆m pơyan thi, roi tơƀôh Trong ôn thi đei điêm lơ, tơgŭm găh jơhngâm đon, tơgŭm ăn hŏk tro đei tơdrong arih xa pơmat tat; Sơng sinh viên hle, hơpăh hŏk ƀŏng “Tơgŭm năm hŏk” ăn sinh viên hle, hŏk tro đei tơdrong arih xa pơmat tat….

Tơ̆ lêh tơlĕch hlôi pơgơ̆r lơ tơdrong tôch hơiă nhen roi tơƀôh trong pơm sơđơ̆ng jơhngâm păng roi tơbăt tơdrong jang kăl kơ hŏk adrol kơ thi, pơgơ̆r hơri hơxoang, ngôi pơchơt; truh lăng, hŏk pơhrăm pơlong năng tơ̆ Hnam trưng đăi hŏk, roi tơbăt 4 khul jang tơgŭm “Yak hơdoi hăm bơngai thi”.