Năr akŏm tơbang tơdrong jang đei hloh 1.000 ‘nu bơngai jang truh hơlen, noh bơngai jang, hŏk tro, sinh viên lơ̆m dêh char; 30 anih jang mŭk drăm, anih pơtho tơdrong jang hăm hloh 10.000 tơdrong kăl jang. ‘Nguaih kơ tơdrong jang kŏng ngĭp, iŏk bơngai năm hŏk tơ̆ teh đak đe, năr akŏm tơbang tơdrong jang ‘măng mă âu iŏk đei lơ bơngai jang gah kih thuơ̆t pơguăng, spa, bơngai jang pơgang, bơngai jang pha chê̆, tĕch tơmam drăm.

Ƀơ̆t ‘măng âu, Anih jang tơroi tơbăt kơ Anih mong jên teh đak Việt Nam adoi pơgơ̆r tơdrong akŏm “Hlôh vao gah jên hu” vă tơgŭm ăn bơngai jang tơ̆ Đăk Lăk băt đei tơdrong hlôh vao gah jên hu, đei dôm tơdrong hlôh vao gah jên hu păng tơm a la chă hlak jên Việt Nam, tơdrong vei jên; Bơngai jang oei đei akŏm tơdrong ƀŏk thăm xa hơpah – iŏk tơmam hơpah. Ƀơ̆t ‘măng âu, Anih Asong tơdrong jang dêh char Đăk Lăk adoi asong 50 tơpu tơmam ăn đe đoan viên đei tơdrong hơrih tơnap tap.