'Măng pơlong mă blŭng đei pơgơ̆r xơđơ̆ng, tơnăp, ưh đei bơngai yơ pơm glăi tơchơ̆t tơlĕch. Tôm đe hŏk tro akŏm pơlong akhan, đê pơlong ngữ văn adoi nhen dôm xơnăm adrol păng le lăi hăm dôm đê pơlong hơlen mă hŏk tro đei bơ̆ lơ̆m khei năr âu ki. Đe hŏk tro chơt hơ-iă ăh mă môn Ngữ văn đei tơrĕk truh tơdrong "hơtŏ đon bơnôh".

'Nâu ưh hơdrô̆ jing tơdrong kăl mă oei trŏ hăm jơhnơr xơnăm kơ đe oh, đơ̆ng noh tơgŭm ăn đe hŏk tro đei dôm xơkơ̆t, kơchĕng phara băl. Kiơ̆ tơroi tenh đơ̆ng Anih jang Pơtho Pơhrăm Gia Lai, lơ̆m 'năr pơlong mă blŭng kơ 'măng pơlong lĕch 'măng khuă lăm 12 xơnăm 2023, hăm môn Ngữ văn, jâ̆p dêh char đei  54 hŏk tro ưh đei năm pơlong. Hơdăh noh, kơsô̆ hŏk tro chih măt pơlong môn Ngữ văn noh 14.696 'nu; kơsô̆ hŏk tro năm pơlong noh 14.642 'nu, 54 hŏk tro ưh đei truh pơlong, lơ̆m noh đei 18 hŏk tro kon kông.