Năr ‘nâu (26/7), Lêh hơpong ƀok Nguyễn Phú Trọng oei hơnơ̆ng pơgơ̆r tơ̆ Hnam pơdong kơ teh đak kơsô̆ 5 Trần Thánh Tông, pơlei tơm Hà Nội, pơtơm đơ̆ng 07 jơ pơgê truh 1 jơ kơsơ̆. Lêh pơdong ƀok Nguyễn Phú Trọng đei pơgơ̆r ƀât 1 jơ kơsơ̆ ‘năr 26/7/2024 tơ̆ Hnam pơdong kơ teh đak kơsô̆ 5 Trần Thánh Tông, pơlei tơm Hà Nội păng lêh ƀŭ ƀât 3 jơ kơsơ̆ hơdai lơ̆m năr tơ̆ Pơsat Mai Dịch, pơlei tơm Hà Nội.

Khul pơgơ̆r pơdong ăn Tổng Bí thư Nguyễn Phú Trọng ăn tơbăt, đơ̆ng 7 jơ truh 7 jơ 30 kơmăng ‘năr 25/7, đei 1.565 Khul (hăm dang 55.600 ‘nu bơngai), jĭ dôm bơngai tang măt ăn kơdră chĕp kơ̆l Đảng, Teh đak, dôm anih tơm, anih jang kơpal, khul grŭp, tơring tơrang, dôm khul linh kon pơlei, dôm khul jang tơbôl, bơngai tang măt ăn dôm khul grŭp păng bôl boăl lơ̆m apŭng plenh teh, kon pơlei truh hơpong, gơih kơvang pơkao, sơ ‘ngon hăm unh hnam Tổng Bí thư Nguyễn Phú Trọng, tơ̆ Hnam pơdong teh đak kơsô̆ 5 Trần Thánh Tông (Hà Nội), Hnam hôp Thống nhất (plt Hồ Chí Minh) păng tơ̆ pơlei ƀok Tổng Bí thư Nguyễn Phú Trọng, plei Lại Đà, xăh Đông Hội, apŭng Đông Anh, plt Hà Nội.