Kŏng ty Hnam kmăi đak tơlĕch ŭnh hơyuh Ialy vei lăng bơ̆ jang 3 hnam kmăi đak tơlĕch ŭnh hơyuh tih hloh lơ̆m rim hnam kmăi đak tơlĕch ŭnh hơyuh đak kroong Sê San ‘noh đei: Hnam kmăi đak tơlĕch ŭnh hơyuh Ialy, Hnam kmăi đak tơlĕch ŭnh hơyuh Sê San 3, păng Hnam kmăi đak tơlĕch ŭnh hơyuh Plei Krông, lơ̆m dêh char Gia Lai păng Kon Tum. Akŏp pơm tơlĕch kơ 3 hnam kmăi au ‘noh 1.080 MW, akŏp iŏk đei truh năr 30/6/2023 kơ 3 hnam kmăi pơm tơlĕch đei hloh 102 ti 246 triu kWh. Mă lei lơ̆m 6 khei blŭng sơnăm 2023, pơ đĭ Kŏng ty pơm tơlĕch đei 1 ti 955 triu kWh, jơnei 41,68% trong tơlĕch jang, tŏ sĕt hloh 330 triu kWh pơtêng hăm dôm khei au sơnăm 2022.  

Jĭ hnam kmăi đak tơlĕch ŭnh hơyuh tih hloh tơ̆ thoong đak kroong Sê San, Hnam kmăi đak tơlĕch ŭnh hơyuh Sê San, Hnam kmăi đak tơlĕch ŭnh hơyuh Ialy hlôi bơ̆ jang ‘lơ̆ng hơnăp jang kơ hnam kmăi lơ trong jang: Pơm tơlĕch ŭnh hơyuh, pơchŏh pơtruh ăn đak, chă bơ̆, pơchoh đak pơyan ‘mi hơbŭt hơbông; pơtruh đak ăn tơring pơbăh lơ̆m pơyan phang. Adoi, tơgŭm măh mai đak chă pơro tơruih ‘long pơtăm ăn tơring pơbăh adoi nhen iŏk yua hơ iă găh đak vă pơm tơlĕch ŭnh hơyuh. Ƀok Đinh Viết Thiện, Kơ iĕng Kơdră chĕp pơgơ̆r Kŏng ty Hnam kmăi đak tơlĕch ŭnh hơyuh Ialy, pơma:“Pơyan phang sơnăm au tôch mơmat tat, lơ̆m dôm khei vă hơtuch pơyan ‘mi’nŏh đak ro mong tơ̆ dơnau tŏ sĕt. Kơna đei khei ‘năr đak lơ̆m dơnau och kơtang, adoi nhen chă pơchoh ăn tơ pơbăh jei tŏ sĕt kiơ̆ ƀlep tơdrong tơchơ̆t. Găh păh Kŏng ty hlôi tơroi tơbăt tơtom ăn rim hơnih bơ̆ jang teh đak, hơnih bơ̆ jang kơpal ‘nŏh Grŭp jang adoi nhen Hơnih vei lăng kon pơlei dêh char Gia Lai păng Kon Tum tơlĕch pơchoh trong iung jang lơ liơ vă chă pơchoh, pơro đak sơđơ̆ng ăn tơdrong hơrih sa kơ kon pơlei adoi nhen pơtruh đak choh jang sa. Truh năr 30/6, tơdrong vei kơjăp đak sơđơ̆ng pơchoh ăn tơring pơbăh jei đei hơmet pơ ‘lơ̆ng.”

Ƀok Hồ Trung Đông, Bí thư Đảng uỷ, Kơdră chĕp pơgơ̆r Kŏng ty atŏk tơ iung hnam kmăi đak tơlĕch ŭnh hơyuh Sê San tơbăt: Pơyan phang sơnăm au đak tŏ sĕt pơtêng hăm jô̆ hơtŏ lơ̆m lơ sơnăm, tơjur 15% pơtêng hăm sơnăm 2022. Lơ̆m tơdrong jang hrei au hnam kmăi sơđơ̆ng ăn tơdrong tơlĕch jang đơ̆ng hơnih jang pơ đĭ lơ̆m teh đak. Tơdrong pha tơ̆ hnam kmăi đak tơlĕch ŭnh hơyuh Sa San ‘nŏh đei dơnau găh rŏng tua bin tơlĕch ŭnh hơyuh. Kơ yuơ lơ loh tơdrong chă pơchoh đak ăn găh pơbăh sơđơ̆ng hoei pơm kơnê̆ truh ăn kmăi pơm tơlĕch ŭnh hơyuh. Ƀok Hồ Trung Đông pơma:“Lơ̆m tơdrong rim dơnau tơƀưh 215 đơ̆ng Thủ tướng Teh đak sơnăm 2018, đei tơchơ̆t hăm nhôn găh pơyan phang nhôn kăl sơđơ̆ng măh mai tŏ sĕt hloh ‘noh 195 mét khối lơ̆m mĭnh pơnĭt jơ pơchoh ăn tơ̆ pơbăh. Lơ̆m bơ̆ jang kmăi ‘noh nhôn đei mĭnh dơnau mong răk vă xek tơlang tơdrong lơ̆m mă nhôn pơtruh lơ ‘npoh mong đak lơ̆m noh, păng lơ̆m mă nhôn ưh kơ tơlĕch ŭnh hơyuh ‘nŏh đei tơlĕch pơtruh đơ̆ng Sê San 4. Lơ̆m khei năr au ki ‘noh nhôn sơđơ̆ng ăn chă pơchoh đak tơ̆ pơbăh vă sơđơ̆ng măh mai đak ăn đak kroong Mê Kông. Đei khei ‘năr kơtang hloh, mư̆h ưh kơ đei đak vă pơm tơlĕch ŭnh hơyuh lei nhôn tơroi tơbăt ăn hloi hơnih bơ̆ jang vei lăng đak kroong Mê Kông, tơroi tơbăt hăm Hơnih tơm vei lăng găh đak vă rim pang iung jang hơdoi lơ̆m bơ̆ jang.” 

Kŏng ty kmăi đak tơlĕch ŭnh hơyuh Buôn Kuốp vei lăng 3 hnam kmăi đak tơlĕch ŭnh hơyuh ‘moi kiơ̆ thoong đak kroong hnam kmăi đak tơlĕch ŭnh hơyuh Srêpôk hơlam ƀar dêh char Đak Lăk păng Đak Nông ‘noh: Hnam kmăi đak ŭnh hơyuh Buôn Tuôr srah, Hnam kmăi đak ŭnh hơyuh Buôn Kuốp păng Hnam kmăi đak ŭnh hơyuh Srêpôk 3. Akŏp 3 hnam kmăi au pơm tơlĕch đei 580 MW. Ƀok Nguyễn Đức, kơ iĕng Kơdră chĕp pơgơ̆r Kŏng ty Hnam kmăi đak ŭnh hơyuh Buôn Kuốp tơbăt: 6 khei au ki, akŏp 3 hnam kmăi au pơm tơlĕch ŭnh hơyuh đei 915 triu kWh ŭnh hơyuh, lăp hơtŏ 79% pơtêng hăm sơnăm 2022. Ŭnh hơyuh tơjur ‘nŏh kơ yuơ ưh kơ măh đak đơ̆ng hơtuch pơyan ‘mi păng sa roi kơƀăh hloh dơ̆ng lơ̆m rim khei 3 păng 4 au ki. Mă lei, tơdrong iung jang kơ hnam kmăi đak tơlĕch ŭnh hơyuh Buôn Kuốp oei hơnơ̆ng iung jang.“Kŏng ty hlôi iung jang hơdoi hăm Hơnih bơ̆ jang vei lăng ŭnh hơyuh teh đak vă pơchoh đak sơđơ̆ng ăn tơdrong choh jang sa tơ̆ tơring pơbăh. Truh khei 5 ‘noh đak och kơtang hăm dôm dơnau găh tu Buôn Tua Srah, Kŏng ty hlôi tơroi tơbăt tơdrong au ăn Hơnih vei lăng kon pơlei dêh char vă đei trong pơrô̆ tơlĕch jang lơ liơ mă trŏ lăp. Lơ̆m khei 5 ‘nŏh Hơnih vei lăng kon pơlei dêh char hlôi pơjao ăn Hơnih vei lăng Mơdro sa chĕp pơgơ̆r jơ bơ̆ jang hăm Kŏng ty. Kiơ̆ kơ ‘noh lơ̆m tok bŏk khei 5, hlôi đei trong jang drơ̆ng mĭnh nơ̆r ‘nŏh pơchoh đak ăn pơbăh lăp măh, mong đak ăn tơdrong jang lơ̆m prăt pơyan phang. Truh vă đĭ khei 5, ‘nŏh đak lơ̆m dơnau  Buôn Tuôr Srah hlôi trŏ lăp hăm tơdrong pơkăp ‘lơ̆ng.