Lơ̆m  65 xơnăm kơ âu, hnam kơjung ƀônh ƀŏ oei ăh jih dơnâu đak hlăng hlơr, ăh tong anê̆ pơgar 'long jơk ƀlĭk hlôi jing um ai juăt jue, jing um pơtih ăn kơjă gĭt găh đon bơnôh, trong hơrih pơm jang 'lơ̆ng hơƀăp đơ̆ng Ƀok Kơdră Hồ Chí Minh. 

Hnam kơjung ƀônh ƀŏ ăh tong anê̆ anih tơm Hà Nội, jing anih mă Ƀok Hô hơrih păng pơm jang đunh hloh lơ̆m tơdrong jang kăch mang kơ po. Tơ̆ âu hlôi bơ̆ng pang lơ tơdrong kăp gĭt lơ̆m hnưr hơrih, đei tơdrong gĭt tih tên lơ̆m dôm khei năr hơtuch kơ tơdrong jang kăch mang kơ Ƀok. Tơ̆ hnam kơjung âu, lơ̆m dôm xơnăm ayăt Mih tơlĕch phă pơrăm tơring Tu, năr 17/7/1966, Ƀok Hô hlôi tơ-oei chih nơ̆r krao hơvơn kon pơlei khŏm mă iung tơjră ayăt Mih. Adoi tơ̆ âu, đơ̆ng xơnăm 1965 truh xơnăm 1969, Ƀok hlôi axong jơ vă chih nơ̆r Tơtă kơ hnưr hơrih hăm đon bơnôh băt 'mêm kơ-eng ăn tôm kon pơlei, tôm Đảng, tôm ƀô̆ đô̆i, ăn đe kon mon kon hơ-ioh. Păng adoi đơ̆ng anih âu, Ƀok hlôi lôch hơchăng. Lơ̆m 4 xơnăm pơm jang vei vêr Ƀok păng hloh 30 xơnăm đơ̆ng rŏng kơ noh tơguăt hăm tơdrong jang vei răk tơƀăk mong mŭk drăm Hồ Chí Minh lơ̆m Anih gru grua Kơdră teh đak, ƀok Trần Viết Hoàn, xơ̆ jang Kơdră Anih gru grua Ƀok Kơdră  Hồ Chí Minh lơ̆m cham Hnam Kơdră xơkơ̆t hơdăh: “Hnam kơjung Ƀok oei bơ̆ jang 11 xơnăm, âu jing khei năr kăp gĭt hăm tơdrong hơrih pơm jang kơ Đảng păng teh đak. Ƀok hăm kơchư̆k jang Kơdră glơng xơnong jang trăp trĭn. Tơ̆ âu ưh đei mŭk drăm kăp gĭt krên dên, mă lei hnam Kơjung kơ Ƀok hlôi hram jrŭ lơ̆m tơdrong hơrih. Hnam kơjung kơ Ƀok adrô̆ đei ƀar pêng tŏ lăm, mă lơ̆m đon bơnôh Ƀok khei năr noh hnam iĕ noh adoi ƀenh kơ kial tơhlu păng tar hơdăh, ƀâu phu tru hŭt đơ̆ng pơkao tơnŏ jơhngơ̆m đon kon bơngai. Lơ̆m hnam âu, Ƀok Hô bơ̆n lơ kơmăng ưh đei tep kơyuơ kơchĕng găh kăch mang tơring Pơbăh, kơchĕng kơ kăch mang tơring Tu păng kơchĕng găh tơdrong tơguăt tơguăl apŭng plenh teh. Dôm xơnăm oei tơ̆ âu Ƀok Hô hlôi tơlĕch lơ trong jang kăp gĭt, vă vei xơđơ̆ng hơ-'nhăk kăch mang Việt Nam đei iŏk đơ̆ng tơdrong jơnei mă âu truh tơdrong jơnei nai". 

Giáo sư Hoàng Chí Bảo noh akhan, hnam kơjung tơƀôh hơdăh tơdrong hơrih ƀônh ƀŏ păng hlăng hơdjă kơ Ƀok Hô:  Ƀônh hiôk jing tơdrong hơdăh hloh, jing tơdrong kăp gĭt hloh ăn trong hơrih pơm jang 'lơ̆ng Hồ Chí Minh. Đĭ hnưr hơrih kơ Ƀok hloh 60 xơnăm jang kăch mang, dôm tơdrong hrat tơnap tap adoi truh tơ̆ Ƀok ngăl, mă Ƀok hơrih tôch ƀônh hiôk hăm blăh hơbăn ao kaki tơkloh pơnĭk, đơ̆ng blŭng truh ăh lôch hơchăng adrô̆ blăh hơbăn ao ka ki tơkloh pơnĭk thoi noh, chơkhŏ kơsu hlôi hram lơ̆m hnưr hơrih, dôm tơmam drăm grasia kơ hnưr hơrih hăp tơƀôh um ai đon bơnôh Ƀok Kơdră Hồ Chí Minh – minh bơngai hơrih tôch ƀônh hiôk. 

Hrei âu, hnam kơjung oei lơ̆m Anih gru grua Ƀok Kơdră Hồ Chí Minh lơ̆m cham Hnam Kơdră hlôi anih  "anih kăp gĭt", anih akŏm đon bơnôh kơ kon pơlei Việt Nam păng dôm bơngai 'mêm lăp kơ tơdrong rơngei hiôk hian lơ̆m kơpal teh. Ƀok Tổng Bí thư Nguyễn Văn Linh hlôi akhan: Ƀok hlôi pơlan xă minh jơhngơ̆m pran păng hơrih hăm trong pơkăp, pơdrŏng ưh kĕ tơdui, hin dơnuh ưh kĕ pơm tơplih đon, ai trŏk ưh đei kơdŭn hăm đon bơnôh pơ-'nam, hlăng hơdjă, ưh chă xa yua tơmam đe. Ƀok hơrih minh tơdrong hơrih hlăng hơdjă păng ƀônh hiôk. Tơdrong jang, đon kơchĕng păng đon bơnôh ang hơdăh đơ̆ng Ƀok ling lang oei lơ̆m tơdrong 'mêm kơ-eng hloh kơ kon pơlei Việt Nam”. Oei ƀok Kơdră teh đak Nga Pu-tin, ƀok kơdră mă blŭng kơ anglŏ 21 truh tơmang hnam oei kơ Ƀok Hồ Chí Minh hlôi chih răk: “Inh ƀrơ̆k kơ jơhngơ̆m ăh đei pơm juăt hăm tơdrong hơrih kơ bơngai thâi nuih mơng gơh hơgei kơ kon pơlei Việt Nam. Minh bơngai mă hơnăn hlôi ang bang lơ̆m hnưr hơrih kơ apŭng plenh teh”