Hnam ‘Măn pơdah Hoàng Sa oei ah trong Hoàng Sa, minh lơ̆m dôm jăl trong jih đak dơsĭ ‘lơ̆ng hloh lơ̆m phương Thọ Quang, kuâ̆n Sơn Trà, pơlei tơm Đà Nẵng.

Dôm năr âu, đei lơ hŏk tro, sinh viên, hơdruh tơdăm, đe linh so, tơmoi lơ̆m păng ‘nguaih kơ teh đak atŭm hăm dôm bơngai ‘mêm kơ tơdrong rơngei hiôk hian păng băt ‘mêm kơ đak dơsĭ achon teh pơlei pơla hlôi truh tơmang hơlen băt. Truh lăng dôm um rŭp hla bar chih akŏm kơ Hoàng Sa, Trường Sa pơdah tơ̆ Hnam ‘Măn pơdah Hoàng Sa, boăl Lê Khánh Ly, sinh viên trưng Đăi hŏk Sư Phạm Đà Nẵng tơroi: “Jinh minh ‘nu mơlôh truh tơmang Hnam ‘Măn pơdah Hoàng Sa, minh ‘măng dơ̆ng inh băt hơdah hloh gah sơnong pơgơ̆r kơdih achon teh grasia kơ teh đak, mă kăl hăm 2 achon teh Hoàng Sa păng Trường Sa. Dôm bơngai mơlôh nhôn roi năr roi băt hơdah hloh, tơroi truh rim bơngai pơtoi sơkơ̆t tơdrong pơgơ̆r kơdih achon đak dơsĭ kăp gĭt kơ teh đak. Hoàng Sa păng Trường Sa noh achon teh kơ Việt Nam”.

Dôm um la kak, hla bar chih so sơ̆, đunh kơ âu kơ hrĕng sơnăm păng um rŭp tơbang ăn găr chuơh, kơđoh hơbâu âu to..., tôm noh tơdrong bơ̆ng pang kăp gĭt ăn tơdrong sơkơ̆t tơkăng pơgơ̆r kơdih đơ̆ng Việt Nam tơ̆ 2 achon teh Hoàng Sa păng Trường Sa.

‘Nâu jing dôm tơmam bơ̆ng pang kăp gĭt gah tơdrong pơgơ̆r đơ̆ng Việt Nam hăm achon teh Hoàng Sa; sơnong, anih dơ̆ng, tơdrong kăp gĭt kơ đak dơsĭ lơ̆m tơdrong tơ-iung pơjing păng vei lăng teh đak. Trung uý Lê Xuân Thiêm, Phŏ kơdră Khul tơroi hơvơn kon pơlei, Kơđông linh vei sơlam teh Sơn Trà, Anih tơm Pơgơ̆r Ƀô đô̆i vei Sơlam teh pơlei tơm Đà Nẵng ăn tơbăt: “Khei năr âu ki, khul linh Kơđông Vei lăng sơlam teh Sơn Trà jang atŭm hăm dôm jăl pơgơ̆r tơring, rim anih jang đei tơrĕk dih băl hơnơ̆ng akŏm chă tơroi tơbăt. Kiơ̆ đơ̆ng dôm tơdrong akŏm tơroi dah mă chă năm hơvơn hơdrô̆, nhôn akŏm dôm tơdrong kăl đei tơrĕk truh achon teh kơ Việt Nam. Nhôn hơnơ̆ng pơgơ̆r tơroi gah tơdrong pơyua kăp gĭt ăn kon pơlei jang rôp ka hơdang lơ̆m tơring, tơgop atŭm hăm kon pơlei tơguăt hăm tơring đak dơsĭ kơdih, vei lăng kơjăp tơdrong pơgơ̆r achon teh kơ teh đak Việt Nam”.

Hnam ‘Măn pơdah Hoàng Sa kơyuơ Anih jang vei lăng kon pơlei apŭng Hoàng Sa, pơlei tơm Đà Nẵng vei lăng. Gah hơnăp cham hnam tơƀưh tơpăt gah Đak dơsĭ gah Hlĕch, đei ming man lơ̆m hơgăt teh jê̆ 1.300m2.

Tơdrong ming man đei tơmơ̆t iŏk jang đơ̆ng khei 3/2018, pơih ‘măng ưh kơ iŏk jên ăn kon pơlei păng tơmoi truh tơmang lăng. Rim sơnăm, tơ̆ âu sơng dôm jĭt rơbâu kon pơlei păng tơmoi truh tơmang, hơlen băt gah hnưr hơrih. Hloh 300 lơ̆m kơsô̆ dôm jĭt rơbâu hla bar chih răk, tơmam drăm pơdah tơ̆ âu jing dôm tơdrong bơ̆ng pang kăp gĭt gah tơdrong pơgơ̆r kơdih achon teh kơ Việt Nam hăm 2 achon teh Hoàng Sa păng Trường Sa. Ƀok Lê Tiến Công, Kơdră Anih Asong jang kơ Anih jang vei lăng kon pơlei apŭng Hoàng Sa, Kơdră Hnam ‘Măn pơdah Hoàng Sa ăn tơbăt: “Vă pơm jang ‘lơ̆ng hloh ăn tơmoi truh tơmang păng dôm bơngai yơ ‘meh hơlen băt gah achon teh Hoàng Sa, nhôn pơkăp tơlĕch pơm kiơ̆ Tơdrong jang chih akŏm kiơ̆ kơsô̆ hoă dôm tơdrong kăl băt păng cham ‘măn pơdah tơ̆ Hnam ‘Măn pơdah Hoàng Sa hơtŏk lơ̆m wedsite kơ anih jang vă rim bơngai băt truh um rŭp, hla bar chih răk gah tơdrong pơgơ̆r kơdih đơ̆ng Việt Nam hăm achon teh Hoàng Sa”.

Ƀok Võ Ngọc Đồng, Kơdră Anih jang Nô̆i vŭ adoi jing Kơdră Anih jang vei lăng kon pơlei apŭng Hoàng Sa, pơlei tơm Đà Nẵng sơkơ̆t hơdah: "Nhôn pơgơ̆r bơngai jang tơ̆ Hnam ‘Măn pơdah Hoàng Sa chih akŏm hơtŏk pran tơdrong tơroi tơbăt hlôh vao hơdah păng hơtŏk sơnong jang lơ̆m tơpôl kon pơlei gah tơdrong pơgơ̆r kơdih achon teh đak dơsĭ Hoàng Sa. Nhôn jang hadoi gah tơroi tơbăt hặm dôm tơdrong tơmang lăng, chih akŏm hla bar kăl, pơtho gah hnưr hơrih kơ tơring lơ̆m dôm hnam trưng hŏk lơ̆m tơring. Nhôn jang hadoi hăm Anih jang đoan pơlei tơm, Anih Pơtho Pơhrăm, Anih jang Tơmang pơhiơ̆ kơchăng tơmơ̆t dôm tơdrong kăp gĭt Hoàng Sa truh hăm tơmoi lơ̆m păng ‘nguaih kơ teh đak. Mă kăl, akŏm pơdah truh rim hnam trưng đăi hŏk, phôh thŏng lơ̆m pơlei tơm vă đe hŏk tro, sinh viên, đe mơlôh gơh băt hơdah kiơ̆ đơ̆ng hla bar chih akŏm, dôm tơmam bơ̆ng pang gah hnưr hơrih, trŏ khôi luơ̆t adoi nhen sơnong pơgơ̆r kơdih hăm Hoàng Sa".

Hoàng Sa păng Trường Sa đơ̆ng hơdrol sơ̆ jing minh pah tơring teh grasia kăp ưh gơh tơklah hăm hơgăt teh Việt Nam. Việt Nam đei tôm tơdrong vă bơ̆ng pang gah hnưr hơrih, khôi luơ̆t păng hơnơ̆ng tơchơ̆t tơdrong pơgơ̆r kơ Việt Nam hăm  2 achon teh Hoàng Sa păng Trường Sa.