Tơdrong pơgơ̆r au đei vang năm đơ̆ng kơdră tang măt ăn Trung ương Đoàn Hơdruh tơdăm Kŏng san Hồ Chí Minh, kơdră chĕp pơgơ̆r dêh char, rim hơnih jang păng vă jê̆ 2.000 ‘nu đoàn viên hơdruh tơdăm rim hơdrung dêh char Đăk Lăk.

Lơ̆m jơ ‘năr pơgơ̆r pơm lêh, Kơdră chĕp pơgơ̆r Hơnih Đoàn dêh char Đăk Lăk tơbăt hơdăh tơ̆ hơnăp yang hơbang rim Ƀô̆ đô̆i nuih mơng lôch dŏng teh đak dôm tơdrong jang iŏk đei jơnei lơ̆m giĕng “Nhă đak chăm kơ tu” kơ hơdruh tơdăm dêh char. Kiơ̆ kơ ‘noh, hơdruh tơdăm dêh char Đăk Lăk hlôi pơgơ̆r năm ngôi, pôk ăn hloh 2.700 tơnô̆ tơmam drăm ăn rim ŭnh hnam đei iŏk yua ăn teh đak, ŭnh hnam bơngai rơka-lôch dŏng teh đak, Yă Mĕ Việt Nam nuih mơng hăm kơjă kơjên hloh 800 triu hlak jên. Chă hơvơn hloh 500 ‘nu đoàn viên hơdruh tơdăm tơgŭm djru vang chă ming hơmet hnam oei ăn ŭnh hnam đei iŏk yua ăn teh đak, bơngai rơka, ŭnh hnam bơngai lôch dŏng teh đak, ŭnh hnam đei bơngai iŏk yua ăn kĕch mang; hlŏh 3.000 ‘măng hơdruh tơdăm vang iung jang vei lăng năng tông pơsat teh đak. Kiơ̆ đơ̆ng rŏng ‘nŏh, rim kơdră tang măt atŭm hăm đoàn viên hơdruh tơdăm hlôi glơng ‘măn gơvang pơkao, soh hlôt nhang tơ̆ rim lŏk ƀô̆ đô̆i lôch dŏng teh đak lơ̆m Pơsat teh đak kơ dêh char.