Hăm trong jang “Rơih bơngai bu, ƀlep bơngai ‘noh”, sơnăm 2024, Khul jang krao tơmơ̆t pơm ƀô̆ đô̆i dêh char Lâm Đồng hlôi rơih tôch hơlen vă tơchă đei dôm hơdruh tơdăm pran kơtang hơbĕch hơbal mơ̆t pơm ƀô̆ đô̆i, trŏ ƀlep hăm pơkăp tơ iung pơjing ƀô̆ đô̆i lơ̆m chăl hle. Lơ̆m au, hơdruh tơdăm pran jăng mă 1 păng mă 2 jơnei hloh 64%; măt bơngai hơdruh tơdăm hŏk đang jăl pêng jơnei 36%; trung kâp, kao đăng păng đăi hŏk ‘nŏh 7,5%. Lơ̆m kơsô̆ au, đei 22 ‘nu bơngai pơm ƀô̆ đô̆i ‘noh đảng viên, vă jê̆ 34% ‘nu bơngai pơm ƀô̆ đô̆i ‘noh bơngai kon kông.

Atŭm hăm dôm hơdruh tơdăm năm mơt pơm ƀô̆ đô̆i, ‘măng mă au lơ hơdruh tơdăm gơ̆h hơgei dêh char Lâm Đồng jei năm mơ̆t pơm kŏng ang. Tơ̆ pơm lêh pơjao, kơdră chĕp pơgơ̆r dêh char Lâm Đồng păng rim apŭng, pơlei tơm lơ̆m dêh char hlôi pôk ăn pơkao, hơlêm rim hơdruh tơdăm mơ̆t pơm ƀô̆ đô̆i kiơ̆ yok rok jơ̆ng joăt joe nuih mơng kơ hơdrĕch hơdrung, hơnơ̆ng kiơ̆ yok mĕ ƀă yă ƀok năm vei lăng Teh đak. Hơdrol kơ ‘noh, rim tơring kơ dêh char Lâm Đồng jei pơgơ̆r pơm kơtrăi năm mơ̆t pơm ƀô̆ đô̆i; năm ngôi, pôk tơmam drăm păng hơlêm rim bơngai ‘nao mơ̆t pơm ƀô̆ đô̆i.