Chi ƀô̆ thôn Đak Ga, tơring sơlam teh đak Đak Nhoong, apŭng Đak Glei, dêh char Kon Tum đei 23 ‘nu đảng viên păng đĭ đăng jĭ bơngai Jeh Triêng. Đơ̆ng tơdrong tơjê̆ hăm kon pơlei, tơjê̆ hăm ŭnh hnam pơm jŭk yŭk trong hơlou kơ rim đảng viên, 112 ŭnh hnam hăm vă jê̆ 360 ‘nu măt bơngai thôn Đak Ga vang kơrŭn iung jang lơ̆m vei lăng trong sơlam, hơdrơ̆ng sơlam teh đak. Jơhngơ̆m đon tơgŭm djru dih băl lơ̆m atŏk tơ iung mŭk drăm ŭnh hnam đơ̆ng kon pơlei lơ̆m thôn đei iung jang kiơ̆ kơtang. Ƀĭ thư chi ƀô̆, jang hloi Kơdră chĕp pơgơ̆r thôn A Cu tơbăt, rim sơnăm mĭnh ‘nu đảng viên lơ̆m chi ƀô̆ jei pơkăp păng đei trong tơlĕch jang hơdăh jang kiơ̆ dôm trong jang hŏk pơhrăm păng pơm kiơ̆ Ƀok Hô. Kơdih ƀok A Cu jei nhen rim đảng viên anai lơ̆m chi ƀô̆ jei ƀôh tơdrong hŏk pơhrăm păng pơm kiơ̆ Ƀok Hô tôch hơ iă:“Rim năr bơ̆n hŏk pơhrăm păng pơm kiơ̆ Ƀok hô ‘noh hŏk păng pơm kiơ̆ dôm tơdrong hơ iă, tơdrong ‘lơ̆ng. Hŏk kiơ̆ Ƀok găh pơkom răt sa kơ ‘năr. Đơ̆ng noh hŏk kiơ̆ tơdrong oei sa, pơma dơnuh ‘lơ̆ng hơ iă, chă pơrô̆ hơvơn kon pơlei hơdrin jang sa yak hloh dơnuh hin kơjăp  ‘lơ̆ng”.       

Sơnăm 2023 tơlĕch jang kiơ̆ Trong tơlĕch jang đơ̆ng Hơnih Đảng dêh char Kon Tum “Hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô găh tơnăp, phăl hơlăng, tơgop tơ iung pơjing dêh char Kon Tum atŏk tơ iung tĕnh koăng păng kơjăp”, rim chi ƀô̆ tơring kon kông kơ dêh char Kon Tum hlôi đei lơ trong hŏk pơhrăm păng pơm kiơ̆ Ƀok Hô trŏ lăp hăm yan ou tơ̆ tơring pơlei kơdih. Kơ iĕng Ƀĭ thư chi ƀô̆ A Vét, hơdrung Hre, oei lơ̆m thôn Vi Ô Lắk, tơring Pờ Ê, apŭng Kon Plông tơbăt, ƀôh hơdăh kon pơlei lơ̆m pơlei tim gan hlôh vao găh rong kon tơrong păng jang chŭn na ƀa đak, hăm băt hlôh ƀôh hơdăh lơ̆m tơdrong chă rong kon tơrong păng vei lăng năng tông chŭn na ƀa đak, băt hơdăh găh tơdrong choh jang sa ‘nhŏng apĭnh tơlĕch jang kiơ̆ trong jang ou hăm hơpơi ‘meh vă gô tơgŭm ăn kon pơlei atŏk tơ iung choh jang sa:“Nhen Ƀok Hô hlôi pơtho ‘noh đảng viên pơm jŭk yŭk trong hơlou, kăl iung jang hơdrol ‘noh kon pơlei ƀôh bơ̆n jang đei iŏk yua kơjăp ‘noh mă jang kiơ̆. Nhen chă rong kon tơrong ‘noh bơ̆n chă pơrô̆ athei kon pơlei rong kon tơrong kăl pơm hơdroong rơgoh ‘lơ̆ng, hoei pơm ‘mê̆ ‘mach cham char kơna mă hoei đei pơrang jĭ pơrăm. Găh jang ƀa đak, ba chă hŏk pơhrăm jang lơ liơ mă đei plei ăl ‘noh ba chă pơtho tơbăt ăn kon pơlei jang kiơ̆”.

Jĭ mĭnh lơ̆m dôm bơngai đảng viên kon kông jang ‘lơ̆ng đei pôk pơ ư, pôk hơpăh tơ̆ Hop akŏm lăng hơlen jang kiơ̆ Nơ̆r athei jang kiơ̆ kơsô̆ 01 đơ̆ng Hơnih tơm Chinh trĭ “găh atŏk kơtang hŏk pơhrăm păng jang kiơ̆ jơhngơ̆m đon ‘lơ̆ng, trong jang hơgei kơ Ƀok Hô” sơnăm 2023-2024 kơ yuơ Hơnih Đảng dêh char Kon Tum pơgơ̆r ƀlep lơ̆m khei ‘năr rơneh Ƀok Hô khei 5 ou ki, Kơ iĕng Ƀĭ thư chi ƀô̆ jang hloi Thôn trơng A Huê̆, hơdrung Xơdang, pơlei Kon Nhên, tơring Đak Ruông, tơbăt:“Hok pơhrăm păng pơm kiơ jơhngơ̆m đon ‘lơ̆ng, trong jang hơgei kơ Ƀok Hô, kơdih bơ̆n jei hlôi chă pơrô̆ hơvơn kon pơlei tơ iung pơjing tơring tơrang ‘nao. Kơdih ba chă pơrô̆ hơvơn kon pơlei choh hơpoong choong pơchôp, choong choh pơ ‘lơ̆ng cham rông, chă hơvơn kon pơlei tơra kon jên, năr jang ming hơmet trong nơnăm. Tơdrong hơrih sa kơ kon pơlei dang ei hlôi băt hlôh ƀôh hơdăh ƀiơ̆”.

Đơ̆ng tơdrong hŏk pơhrăm păng pơm kiơ̆ Ƀok Hô, 3 sơnăm ou ki đảng viên tơ̆ rim apŭng, tơring kơ dêh char Kon Tum hlôi pơjing đei hloh 800 trong jang tơgŭm djru dih băl, tơgŭm dih băl atŏk tơ iung mŭk drăm, hơmet ming mir pơgar, hŭt dôm tơdrong joăt joe pă trŏ lăp ... Đơ̆ng dôm trong jang ou hloh 6.300 ŭnh hnam kon kông dơnuh păng hloh 3.300 ŭnh hnam vă jê̆ dơnuh đei sơng iŏk tơdrong tơgŭm djru găh hơdrĕch, kon jên jang sa, pơtho tơbăt kih thuơ̆t lơ̆m choh jang sa. Kơ iĕng Ƀĭ thư Đảng apŭng Ngŏk Hôi Phạm Hải Châu tơbăt, Hơnih Đảng apŭng ling lang xơkơ̆t hơdăh tơdrong hŏk pơhrăm păng pơm kiơ̆ Ƀok Hô ‘noh jing tơdrong jang chinh trĭ gĭt kăl hloh. ‘Nou jei jing tơdrong kăl hlŏh pơm đei tơdrong tơplih kơtang hăm tơring mă bơngai kon kông đei 60% măt bơngai lơ̆m apŭng: “Tơdrong jang kiơ̆ Ƀok Hô hlôi pơm hơtŏk kơtang jơhngơ̆m đon tơchĕng, trong jang păng pơjing đei lăp đon dih băl kơtang, mĭnh nơ̆r ƀơ̆r đon  lơ̆m pơ đĭ Hơnih Đảng jang kiơ̆ tơdrong jang chinh trĭ, mŭk drăm-tơpôl, vei lăng sơđơ̆ng păng tơ iung pơjing Đảng păng khul jang chinh trĭ. Hơmet pơ ‘lơ̆ng jơhngơ̆m đon lui yom đơ̆ng kon pơlei hăm Đảng. Tơdrong pơgơ̆r jang kiơ̆ tơdrong hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô hlôi đei ƀôh đei lơ trong jang hơ iă, jơnei păng tŏk bŏk lang să kơtang”.

Lang să hŏk pơhrăm păng pơm kiơ̆ tơdrong ‘lơ̆ng đơ̆ng Ƀok Hô, rim chi ƀô̆ tơring kon kông kơ dêh char Kon Tum hlôi tơgop kơtang lơ̆m jang kiơ̆ rim trong tơlĕch jang atŏk tơ iung kơ Hơnih Đảng dêh char Kon Tum, nhen: pơm hơtŏk jang ‘lơ̆ng hloh dơ̆ng tơ iung pơjing tơring tơrang ‘nao, tơjur dơnuh kơjăp ‘lơ̆ng; jang kiơ̆ jơnei rim ‘Măng hơvơn “Pơm tơplih jơhngơm đon tơchĕng, trong jang kơ kon kông, pơm ăn kon pơlei kon kông hơdrin jang sa yak hloh dơnuh hin kơjăp ‘lơ̆ng"...Tơdrong atŏk kơtang ‘lơ̆ng hơnăp jang pơm juk yŭk trong hơlou lơ̆m hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơgei kơ Ƀok Hô đơ̆ng đảng viên oei pơjing đei tơdrong hưch hanh, lang să kơtang găh tơdrong kăl lơ̆m tơdrong hŏk pơhrăm păng pơm kiơ̆ Ƀok Hô tơ̆ tơring kon kông dêh char Kon Tum.