Nguyễn Văn Khởi jĭ bơngai yua mạng tơpôl hơlĕnh vă jê̆ 100 ‘nu vă tơgar iŏk hloh 500 triệu hlak jên. Kiơ̆ dăr hơlen blŭng a, hơtuch khei 10/2023, Anih vei lăng sơđơ̆ng mạng păng tang găn pơm glăi yua kơmăy kơmŏk hơgei Kŏng an dêh char Dak Lak sơng iŏk hla ar tơroi đơ̆ng 1 ‘nu kon pơlei oei tơ̆ xăh Ea Tu, pơlei tơm Buôn Ma Thuột, hăm tơdrong tơroi đei 1 ‘nu bơngai hơlĕnh tĕch ƀum pơkao lay ơn lơ̆m mạng đang kơ ‘noh tơgar iŏk đei hloh 10 triệu hlak jên. Hăm dôm trong jang gơh băt, kŏng an băt hơdăh bơngai hơlĕnh pơdăr ‘noh Nguyễn Văn Khởi, tŏk bŏk arih sa tơ̆ dêh char Sóc Trăng.

Nguyễn Văn Khởi tơ̆ anih jang kŏng an

Bơ̆jang hăm kŏng an, blŭng a Khởi tơroi, hlôi đei tơdrong yoch “Hơlĕnh pơdăr tơgar iŏk mŭk drăm”, tam mă đei sut tơdrong pơm yoch. Hơtuch sơnăm 2022, bơngai âu ‘nao lĕch đơ̆ng hnam pơnă păng hơnơ̆ng đei tơchĕng vă hơlĕnh pơdăr iŏk jên răt yua. Vă pơm hơlĕnh pơdar đe, Khởi pơm tài khoản Facebook hơnăn "Hoa Tươi Đà Lạt”, vang mơ̆t hơdai lơ̆m grŭp tĕch mơdro hơdrĕch dôm kơ loăi pơkao păng ‘long sa plei lơ̆m Facebook.

Mưh đei bơngai pơma dơnuh vă răt, Khởi athei gơih jên pơkăp hơdrol đang kơ ‘noh sư găn pơma dơnuh, tơ gar iŏk jên. Hăm tơdrong hơlĕnh âu, đơ̆ng hơtuch sơnăm 2022 truh dang ei, Khởi hlôi hơlĕnh vă 100 ‘nu tơ̆ lơ dêh char, pơlei tơm lơ̆m teh đak, tơgar iŏk kơsô̆ jên hloh 500 triệu hlak jên./.