Vang năm truh hăm Năr akŏm tơdrong jang kơyuơ Anih jang vei lăng kon pơlei pơlei tơm Buôn Ma Thuột atŭm hăm Anih Asong tơdrong jang dêh char Đăk Lăk pơgơ̆r ah blŭng khei 5 âu ki, Kŏng ti jang Vũ Nguyên Bio tơlĕch tơchơ̆t iŏk tŏ sĕt jat noh 30 ‘nu bơngai jang. Mă lei tơdrong jang ưh đei jơnei nhen ‘meh vă.

Pơmai Nguyễn Thị Ý Nga, Kơdră Kŏng ti ăn tơbăt, rim khei Kŏng ti kăl iŏk pơhlom 50 ‘nu bơngai jang hăm dôm tơdrong jang nhen: bơngai jang pha chê̆, bơngai jang kih thuơ̆t spa, nail, gah tơdrong jang tơmang pơhiơ̆, khăch sạn vă tơbang ăn tơring iŏk bơngai jang, chŏng mă đơ̆ng blŭng sơnăm truh dang ei pơtơm iŏk đei 30 bơngai jang đĕch: “Dang ei kơsô̆ bơngai jang đei asong pơm jang ăn Kŏng ti tam mă tôm mah, kơlih Kŏng ti đei 3 anih jang noh Đăk Lăk, Đăk Nông păng Phú Yên. Ưh kơ mah noh duh tam mă asong tôm bơngai jang ăn anih jang mă 3.”

Jing anih jang mŭk drăm tŏk bŏk oei đei lơ bơngai jang hloh tơ̆ Đăk Lăk, hăm pơhlom 1.500 ‘nu bơngai. Kŏng ti Able Joy tơ̆ anih jang kŏng ngĭp Hòa Phú adoi oei ƀơm tơnap tap lơ̆m tơdrong iŏk bơngai jang. Ƀok Trần Chí Vĩ, Phŏ Kơdră dơnơm Kŏng ti Able Joy tơroi, dang ei kŏng ti tŏk bŏk oei hơmet tơmơ̆t pơm jang hăm anih jang mă 2. Anih jang âu kăl iŏk pơhlom 3.000 ‘nu bơngai jang. Đơ̆ng blŭng sơnăm truh dang ei, Kŏng ti hlôi tơguăt lơ trong jang, jang hadoi hăm lơ anih jang vă iŏk bơngai jang, mă lei iŏk đei pơhlom 300 hô sơ chih măt. Chih măt răt tơmam noh lơ, anih pơm tơlĕch tơmam drăm pơtơm pơm jang, mă lei bơngai jang tam mă tôm mah noh pơm ăn Kŏng ti athei chă trong nai vă vei mah tơmam drăm asong tĕch: “Tơmam kăl răt ah sơnăm 2024 tŏk 50%, anih pơm tơlĕch tơmam drăm pơkăp noh 1/6 keh đang, mă tơm noh dang ei kăl bơngai jang, mưh đei noh ba kơchăng pơm jang, mă lei dang ei tŏk bŏk oei kăl bơngai jang. Mưh ưh kơ mah bơngai jang noh athei chă tôm đơ̆ng dôm anih jang, kŏng ti nai tơgŭm vang jang vă vei sơđơ̆ng mah tơmam tĕch kiơ̆ pơkăp”

Adoi kiơ̆ tơroi đơ̆ng Anih asong tơdrong jang dêh char Đăk Lăk, lơ̆m jăl I/2024, đei hloh 50 anih jang mŭk drăm vang akŏm lơ̆m 13 ‘măng akŏm tơbang tơdrong jang kơyươ Anih asong jang pơgơ̆r hăm kăl iŏk lơ hloh 7.000 ‘nu bơngai jang. Anih asong jang adoi hlôi tơroi tơdrong jang ăn hloh 12.000 ‘nu bơngai jang, chŏng mă hơdrô̆ 440 ‘nu bơngai đĕch đei năm jang đơ̆ng rŏng kơ noh. Adoi lơ̆m jăl I sơnăm 2024, Anih asong jang hlôi iŏk jê̆ 1.500 hô sơ pơkăl xa jên ƀao hiêm tơgŭm ưh đei tơdrong jang. Tơdrong kăl iŏk bơngai jang lơ, kơsô̆ bơngai iŏk xa jên ƀao hiêm tơgŭm ưh đei tơdrong jang adoi tŏk lơ mă lei tam mă đei tơdrong tơroh tơnăp đơ̆ng bơngai jang păng anih iŏk jang, noh jing tơdrong hơlơ̆k hơle tŏk bŏk oei ƀôh tơ̆ Đăk Lăk. Tơblang gah tơdrong mă âu, ƀok Nguyễn Văn Cường, Phŏ Kơdră Anih asong tơdrong jang dêh char Đăk Lăk ăn tơbăt: “Mă lơ bơngai jang chôt vih xa jên ƀao hiêm tơgŭm ưh đei tơdrong jang hăm tơdrong xa hơdrol đơ̆ng rŏng kơ noh pơtơm chă tơdrong jang. Minh ƀar bơngai ‘meh chă tơdrong jang mă lei jên khei jang tơ̆ Đăk Lăk kơđeh hloh kơ dôm dêh char gah pơbah, noh ưh đei tơklep hăm tơdrong jang”

Ƀok Nguyễn Quang Thuân, Phŏ Kơdră Anih Asong jang, Linh jĭ rơka păng Tơpôl dêh char Đăk Lăk sơkơ̆t hơdah, dêh char tŏk bŏk oei đei bơngai jang hăm pơhlom 1,2 trĭu bơngai lơ̆m sơnăm oei pơm jang. Dôm sơnăm kơ âu, Anih Asong jang, Linh jĭ rơka păng Tơpôl dêh char hlôi hơtŏk pran tơdrong tơguăt pơtho, tơroi tơdrong jang ăn bơngai pơm jang hăm anih jang mŭk drăm, đơ̆ng anih jang mŭk drăm hăm dôm tơring vă tơroh asong – kăl. Mă lei, tơdrong jang tam mă đei jơnei nhen ‘meh vă. Ƀok Thuân akhan, đơ̆ng tơnap tap lơ̆m chơ chă bơngai jang pơkăl anih jang mŭk drăm athei hơtŏk tơdrong pơyua vă bei jơ̆ng bơngai pơm jang: “Bơngai jang hmă noh lơ, phơ phŏ bơngai jang đei chư̆ng chih tơdrong jang adoi lơ mơ̆n. Tơdrong kăl tơ̆ âu noh bơngai gơh truh hăm anih jang mŭk drăm dah mă ưh noh kơyươ đơ̆ng lơ tơdrong, lơ̆m noh đei jên khei jang, tơdrong pơyua lơ̆m tơpôl, gah cham char pơm jang noh jing dôm tơdrong mă rim anih jang mŭk drăm athei tơplih, bơngai jang adoi kăl pơtrŏ vă 2 pah gơh tơƀơ̆p băl.