Atŭm hăm ‘nŏh, dêh char hlôi kĭ hla ar pơkăp jang hơdoi hăm dêh char Attapeu, teh đak CHDCND Lào. Mă hơdăh, kơdră chĕp kơ̆l Anih vei lăng kon pơlei dêh char Đắk Lắk hlôi tơƀâp 27 khul grup đơ̆ng apŭng plenh teh vang truh hăm Lêh cheh phe Buôn Ma Thuột. Lơ̆m noh đei yă Vanusia Nogueira, Kơdră chĕp kơ̆l Abnih jang chĕh phe apŭng plenh teh; dôm Bơngai tang măt gĭt kăl ăn teh đak Mi tơ̆ Việt Nam, Bơngai tang măt ăn teh đak Mông Cổ tơ̆ Việt Nam, Bơngai tang măt ăn Philippines tơ̆ Việt Nam, Kơdră Anih tang măt ăn teh đak Nga tơ̆plt Hồ Chính Minh, Anih tang măt ăn Ấn Độ tơ̆ plt Hồ Chí Minh, Anih tang măt ăn teh đak Lào tơ̆ Đà Nẵng... 

Pơma tơ̆ jơ sơng, ƀok Trương Công Thái, Phŏ Kơdră vei lăng kon pơlei dêh char Đắk Lắk hơmĕng, lơ̆m dôm năr truh hăm lêh, lơ tơmoi đơ̆ng teh đak đe truh ngôi hăm lơ tơdrong tôch hơiă găh groi teh, kon bơngai Đắk Lắk pơma atŭm păng plt Buôn Ma Thuột pơma hơdrô̆. Ƀok hơpơi ‘mĕh Anih jang tang măt ăn dôm teh đak tơ̆ Việt Nam, khul jang đơ̆ng dôm dêh char tơ̆ teh đak jê̆ băl, Bơngai tang măt ăn dôm teh đak, khul grŭp đơ̆ng apŭng plenh teh vang yak hơdoi hăm Đắk Lắk tưk tơiung dôm kơjă kăp gĭt găh jŏh ayŏ kơ dŏ xoang, tơdrong ƀou phu ‘lơ̆ng đơ̆ng cheh phe Buôn Ma Thuột kŭm nhen dôm tơdrong ‘lơ̆ng vă tưk tơiung tơring teh “bri kông kông ‘lơ̆ng rŏ” truh hăm bôl boăl lơ̆m apŭng plenh teh.