Hăm 135 unh hnam bơngai Jeh - Triêng tơ̆ plei Dục Nhầy 1, xăh sơlam Đăk Dục, apŭng Ngọc Hồi, dêh char Kon Tum, đe kăn ƀô̆, linh tơ̆ kơđông Dục Nông nhen thoi ‘nhŏng oh lơ̆m hnam. ‘Nhŏng A Luật, 1 ‘nu bơngai lơ̆m pơlei ăn tơbăt: Kon pơlei hơnơ̆ng ‘măn jơhngâm đon tôch ‘lơ̆ng mưh bou truh đe kăn ƀô̆, linh vei lăng tơring sơlam: “Kơđông pơngơ̆t truh rim unh hnam, bơngai pơmat tat. Iŏk tơgŭm, vei rong lơ hơiŏh ưh pŭn ai. Hơnơ̆ng tơrek truh tơ̆ kon pơlei lơ̆m xăh Đăk Dục. Inh ƀôh, đe linh ƀô đô̆i vei lăng tơring sơlam tơ̆ âu oei xa tôch ‘lơ̆ng, hơnơ̆ng băt ‘mêm kơ kon pơlei”.

3 sơnăm âu ki Khul kơdră chĕp kơ̆l Kơđông Dục Nông athei Thiếu tá Dương Văn Lương jur hŏk hôp tơ̆ Chi ƀô̆ pơlei, hơtŏk đon jang tơnăp đơ̆ng linh vei lăng sơlam hăm Đảng, hăm kon pơlei. Yă Xiêng Thị Tuý, Bí thư Chi ƀô̆, pơm hloi Bơngai pơgơ̆r plei Dục Nhầy 1 tơroi, Thiếu tá Dương Văn Lương roi tơƀôh ăn Chi ƀô̆ tơlĕch dôm tơdrong tơchơ̆t kăl pơm tơplih ‘lơ̆ng tơdrong tơiung pơjing Đảng păng pơm hơtŏk tơdrong arih xa ăn kon pơlei. Đơ̆ng blŭng jăl jang truh dang ei Chi ƀô̆ plei Dục Nhầy 1 tơmât đei 2 ‘nu đảng viên ‘nao, hơtŏk đĭ đăng đảng viên lơ̆m Chi ƀô̆ truh 19 ‘nu, tơjur unh hnam tơnuh tơ̆ pơlei, jur pă 6 unh hnam:

“Ƀok Dương Văn Lương vang jang tôch tơnăp, tơgop lơ năr ‘lơ̆ng vă pơjing, tơgŭm ăn Chi ƀô̆ tơlĕch trong jang đang kơ ‘nŏh jĭ tơdrong tơchơ̆t đơ̆ng Chi ƀô̆ păng đei trong pơgơ̆r hŏk hôp roi ‘lơ̆ng hơiă, sơng đei lơ đảng viên. ‘Ngoăih kơ dôm tơdrong jang ‘nŏh, ƀok Dương oei hơnơ̆ng chă tơgŭm ăn mih ma duch nă, ƀô đô̆i hăm kon pơlei oei xa hơdai kơjăp ‘lơ̆ng. Đơ̆ng đei linh vang jur jang tơ̆ Chi ƀô̆ ‘nŏh pơlei kŭm iŏk đei hơnăn pơlei rơgŏh ‘lơ̆ng, ưh đei unh hnam pơm glăi luơ̆t”.

Hơmet kơjăp hlŏh dơ̆ng tơdrong pơvei đơ̆ng linh hăm kon pơlei, “pơjing đon lui” kơjăp ‘lơ̆ng lơ̆m kon pơlei, đơ̆ng sơnăm 2020 truh dang ei Anih chĕp kơ̆l pơgơ̆r khul linh vei lăng tơring sơlam dêh char Kon Tum athei đe si kuan, linh đơ̆ng dôm kơđông jur jang tơ̆ đĭ đăng 13 xăh sơlam hăm teh đak Lào păng Campuchia. Lơ̆m noh, đei 4 ‘nu kăn ƀô̆ Kơđông vang jang lơ̆m khul chĕp kơ̆l đảng kơ 4 apŭng; 13 ‘nu kăn ƀô̆ jang lơ̆m khul chĕp kơ̆l đảng tơ̆ 13 xăh sơlam; 17 ‘nu kăn ƀô̆ đei pôk jang lơ̆m Jơnŭm pơgơ̆r kon pơlei tơ̆ dêh char, apŭng, xăh…

Trung tá A Ngọc Chiến, tơ̆ Kơđông Đăk Nhoong đei Anih chep kơ̆l pơgơ̆r khul linh vei lăng tơring sơlam dêh char Kon Tum athei iŏk jang kơchưk pơm Phó Bí thư Đảng xăh, Kơdră Anih dăr hơlen kơ xăh sơlam Đăk Nhoong, apŭng Đăk Glei, dêh char Kon Tum ăn tơbăt, kŭm hăm anih chĕp kơ̆l đảng hơmet kơjăp, pơjing Đảng ƀô̆ pran kơjăp, ‘nhŏng hơnơ̆ng tơtăm hăm tơdrong tơgŭm ăn kon pơlei sut hut pơđĭ tơdrong juăt ưh kơ ‘lơ̆ng păng pơm hơtŏk tơdỏng arih xa:

“Inh roi tơƀôh ăn Anih chĕp kơ̆l Đảng xăh tơlĕch tơdrong Tơchơ̆t chĕp kơ̆l pơgơ̆r, pơtho ăn Anih vei lăng kon pơlei, MTTQ păng dôm khul jang chinh trĭ, tơpôl mĭnh jơhngâm đon vang bơ̆ jang, pơgơ̆r hơlen năng dôm trong jang atŏk tơiung mŭk drăm, mă loi jĭ bơ̆ jang sut pơđĭ dôm tơdrong juăt ưh kơ ‘lơ̆ng vă pơm ăn kon pơlei kon kông gơ̆h jang tŏk klăih đơ̆ng tơnuh hin kơjăp ‘lơ̆ng. Jĭ tơring sơlam, tơring đei bri ‘long tang găn sar bar, nhôn chih hơdăh pơtăm ‘long pơgang, mă 1 jĭ sâm Ngọc linh, mă 2 ‘nŏh nhôn tơlĕch trong pơtăm pơmâu Linh chi vă hơtŏk kơjă tơmam đơ̆ng choh jang đei”.

Lơ̆m dôm sơnăm âu ki, hăm đon tơchĕng “Kơđông jĭ hnam, tơring sơlam jĭ pơlei pơla, mih ma duch nă jĭ ‘nhŏng oh”, khul linh vei lăng tơring sơlam dêh char Kon Tum đei lơ tơdrong jang tôch ‘lơ̆ng, hơmet kơjăp tơdrong pơvei đơ̆ng linh hăm kon pơlei tơ̆ tơring sơlam. Nhen trong jang “Pơjing pơlei Đăk Ga, xăh Đăk Nhoong, apŭng Đăk Glei phĭ tơtŏ, dơnŏ ‘lơ̆ng, sơđơ̆ng, dơ̆ng kơjăp”; dôm tơdrong jang pơyoa ăn tơdrong arih xa kơ kon pơlei, nhen: Hnam kơmăy unh điên Đăk Giao/Đăk Long; pơm đak tơ nglang Bờ Y, Đăk Long, Đăk Blô; trong jang vei lăng, pơm pô̆ ƀăn hăm unh hnam đei tơdrong arih xa pơmat tat, tơgŭm ăn đe sư jang tŏk klăih đơ̆ng tơnuh; tơgŭm ăn 74 ‘nu kon mon kiơ̆ tơdrong jang “Chông ba oh năm hŏk”; 15 ‘nu mon jĭ kon rong Kơđông vei lăng tơring sơlam…

Đơ̆ng tơdrong vang yak hơdoi, tơdrong tơgŭm tôch ‘lơ̆ng đơ̆ng đe kăn ƀô̆, linh vei lăng tơring sơlam, truh dang ei đĭ đei 7 lơ̆m kơsô̆ 13 xăh sơlam kơ dêh char Kon Tum jang kĕh tơdrong pơjing tơring tơrang 'nao. Kŭm hăm 'nŏh jĭ tơdrong arih xa kơ kon pơlei tơ̆ tơring sơlam kơ dêh char Kon Tum roi đunh roi tŏk, “đon lui đơ̆ng kon pơlei” roi kơjăp 'lơ̆ng.