Hop akŏm pơma tơlĕch lơ tơdrong jing athei hơmet ming, tơplih ‘nao dôm công ty choh jang xa, pơtăm ‘long tơ̆ Đắk Lắk jang xa ưh đei yoa. Kiơ̆ kơ ‘nŏh, 1,2 tơdrong tơgŭm, tơdrong hơgăt oei tam mă lăp, ưh kơtôm, ƀơm ưh ‘lơ̆ng truh anih jang păng bơngai iŏk jang, vei lăng ‘long pơtăm. Kơsô̆ chih jô̆ găh teh, bri ‘long tam mă tôm, tam mă pơm lăp hăm yăn âu.

Dôm công ty choh jang xa, pơtăm ‘long tam mă bơ̆ jang ‘lơ̆ng tơdrong vei lăng teh păng bri ‘long đei pơjao. 1,2 công ty pơm hla ar kơdih asong ăn dôm khul grŭp, lơ bơngai thuê dơ̆ng teh ƀât tam mă đei trong jang đơ̆ng dêh char. Tơdrong hơlen năng teh đei pơjao ăn tơring vei lăng bơ̆ jang tam mă lăp jing đei tơdrong tơkêng băl đunh.

Ƀok Nguyễn Đình Trung, Bí thư đảng dêh char Đắk Lắk akhan, tơdrong hơmet ming, tơplih ‘nao dôm công ty choh jang xa, pơtăm ‘long khei ‘năr âu ki tam mă lăp hăm đon pơhnŏng đei tơlĕch lơ̆m Tơdrong tơchơ̆t kơsô̆ 30 sơnăm 2014 đơ̆ng Anih tơm Chinh trĭ. Dêh char athei năng tơpăt găh dôm tơdrong oei đei tơ̆ dôm công ty vă đei trong sek tơlang păng tơlĕch nơ̆r pơma apinh mă tơgăl hăm Anih tơm Chinh trĭ, Khul kơdră teh đak, Quốc hội.