Tổng Thư ký Kuô̆k hô̆i, kơdră chĕp pơgơ̆r Hơnih bơ̆ jang Kuô̆k hô̆i Bùi Văn Cường tơbăt: ‘măng hop akŏm mă 7, Kuô̆k hô̆i gô lăng hơlen 40 tơdrong,lơ̆m au đei 24 tơdrong găh bơ̆ jang pơjing khôi luơ̆t, 16 tơdrong găh mŭk drăm tơpôl, kon jên bơ̆ jang teh đak, dăr lăng păng rim tơdrong kăl anai. ‘Măng hop akŏm au đei pơgơ̆r lơ̆m 27 năr, pơgơ̆r blŭng a lơ̆m năr 20/5 păng pơtôch lơ̆m kơsơ̆ năr 28/6.

Tơ̆ ‘măng hop akŏm, rim kơdră jang lơ̆m Hơnih chĕp pơgơ̆r Kuô̆k hô̆i akhan, găh tơdrong Khul kơdră teh đak tơlĕch ăn Khôi luơ̆t Groi teh sơnăm 2024 đei jang kiơ̆ hloi đơ̆ng năr 1/7/2024 tơplih ăn năr 1/1/2025 nhen lơ̆m Khôi luơ̆t Groi teh hlôi tơchơ̆t. Mă lei truh khei năr au, Hơnih bơ̆ jang Kuô̆k hô̆i tim mă iŏk đei Hla bơar pơtruh ăn đơ̆ng Khul kơdră Teh đak athei pơjing Tơdrong tơchơ̆t kơ Kuôk hô̆i hơmet ming, tơmơ̆t dơ̆ng chăl 1, Apăng 252 Khôi luơ̆t Groi teh.