Tơdrong tơchơ̆t 59 đơ̆ng Hơnih tơm Chinh trĭ ‘nŏh tơdrong pơm kơnăl gĭt kăl vă Kuô̆k hô̆i, Khul kơdră Teh đak păng rim hơnih tơm, hơnih bơ̆ jang ƀơm truh tơ iung pơjing păng tơlĕch jang kiơ̆ tơdrong pơkăp, trong jang vă iung jang kiơ̆ kơtang dôm tơdrong đei, tơdrong rơvơn kơ pơlei tơm vă truh sơnăm 2030 Cần Thơ jing pơlei tơm rơgŏh ‘lơ̆ng, gơ̆h hơgei oei sa ‘lơ̆ng hơ iă lơ̆m tơring Tơmăn đak kroong Cửu Long.

Trong tơlĕch jang hăm Khul bơ̆ jang dăr lăng ‘noh lăng hơlen hơdăh rim trong jang kiơ̆ rim trong tơlĕch jang, tơdrong jang; tơƀôh hơdăh dôm tơdrong jang tim mă ‘lơ̆ng păng tơdrong tơm pơm ăn đơ̆ng rŏng 2 sơnăm tơlĕch jang kiơ̆ Tơdrong tơchơ̆t. Kiơ̆ đơ̆ng ƀok Phạm Văn Hiểu, Kơ iĕng Kơdră chĕp pơgơ̆r Đảng pơlei tơm Cần Thơ, ‘nau jing jơ ‘năr vă pơlei tơm lăng hơlen dơ̆ng lơ̆m khei năr au ki, hlôi jang keh đang yă kiơ păng tim mă keh đang yă kiơ vă tơgŭm ăn pơlei tơm kiơ̆ yok dôm tơdrong jang hlôi iŏk đei jơnei, hơmet pơ ‘lơ̆ng dôm tơdrong jang tim mă trŏ lăp, tơnap tap, pơtrŭt atŏk tơ iung kơ pơlei tơm.