Pơgê năr 8/4, tơ̆ Hà Nội, Khul kơdră chĕp pơgơ̆r Hơnih bơ̆ jang Trung ương MTTQ Việt Nam hlôi pơgơ̆r pơm lêh sơng iŏk tơgŭm djru bơ̆ jang pôk pơ ư, hôn bơnê rim ƀô̆ đô̆i nuih mơng pran kơtang, ƀô̆ đô̆i Điện Biên, hơdruh tơdăm năm iung jang sơ̆, dôm bơngai pơdŭ ba ƀrơ̆m phao kơtoang (vang iung tơblăh kơdrăn tơblăh Điện Biên Phủ) lơ̆m teh đak bơ̆n. Ƀok Đỗ Văn Chiến, Bí thư Trung ương Đảng, Kơdră chĕp pơgơ̆r Hơnih bơ̆ jang Trung ương MTTQ Việt Nam vang năm Pơm lêh sơng iŏk tơmam tơgŭm djru.

Tơ̆ jơ pơm lêh, Kơ iĕng Kơdră chĕp pơgơ̆r Hơnih mong jên Teh đak Việt Nam Đào Minh Tú  pơjao ăn kon jên 20 ti hlak jên đơ̆ng Công đoàn Hơnih jang mong jên Việt Nam tơlĕch hơvơn tơra vă pôk pơ ư, hôn bơnê dôm bơngai nuih mơng pran kơtang, ƀô̆ đô̆i Điện Biên, Hơdruh tơdăm năm iung jang sơ̆, kon pơlei chơ pơdŭ ƀrơ̆m phao kơtoang vang iung tơblăh kơdrăn tơblăh Điện Biên Phủ.  Ƀlep lơ̆m jơ ‘năr au, Hơnih mong jên Choh jang sa păng Atŏk tơ iung tơring tơrang Việt Nam tơgŭm ăn 2 ti hlak jên vă tơgŭm tơdrong jang pôk bơnê ăn rim bơngai nuih mơng, ƀô̆ đô̆i Điện Biên, Hơdruh tơdăm năm iung jang sơ̆, kon pơlei chơ pơdŭ ƀrơ̆m phao kơtoang vang iung tơblăh kơdrăn tơblăh Điện Biên Phủ tơ̆ dêh char Thanh Hóa.