Iung pơma pơtôch hop akŏm, Trịnh Mạnh Cường-Kơ iĕng kơdră jang tơgŭm khul kơdră kơ Hơnih chĕp pơgơ̆r Teh đak 389 sơkơ̆t hơdăh, dôm khei vă đĭ sơnăm 2023, tơdrong ‘meh vă jang sa, pơm tơlĕch, tĕch răt lơ̆m khei năr lêh, têt tôch kơ lơ, atŭm hăm kơjă phara dih băl ƀar păh rim teh đak lơ̆m tơring, tơring tơrang lơ̆m teh đak oei tôch kơtang, kơna ƀônh pơm ăn ưh kơmăh minh ƀar tơmam drăm, pơm ăn truh kơjă tŏk măt, ƀônh pơm ăn đei truh tơdrong tĕch mơdro tơtông, pơlơ̆m păng tơmam drăm ya gô roi kơtang hloh dơ̆ng.

Ƀok Cường athei Hơnih chĕp pơgơ̆r 389 rim dêh char Tây Nguyên akŏm bơ̆ jang tang găn tĕch mơdro tơtông, pơlơ̆m păng tĕch mơdro tơmam ya tơ̆ rim trong sơlam teh đak păng rim trong yak jơ̆ng lơ̆m rim tơring; akŏm rim tơmam drăm nhen phŏng, pơgang vei lăng ‘long pơtăm, kơmlăi, đak xăng đak dau; atŏk kơtang jang tang găn tĕch mơdro tơtông, pơlơ̆m păng tơmam drăm ya lơ̆m tĕch mơdro kiơ̆ kmăi kmŏk điên tư.