Lơ̆m ‘măng hop akŏm tơroi tơbăt hơnơ̆ng đơ̆ng Anih tơm jang tơbôl pơgơ̆r kơsơ̆ 29/2 tơ̆ Hà Nội, tơl nơ̆r apĭnh ƀơm truh đon tơchĕng đơ̆ng Việt Nam tơ̆ hơnăp tơdrong Trung Quốc pơtruh duk truh bơ̆jang tơ̆ Hơnih đak dơsĭ đơng Tư Chính tơ̆ đak dơsĭ kơ Việt Nam, Bơngai chă pơma tơlĕch nơ̆r kơ Anih tơm jang tơbôl Phạm Thu Hằng pơma rơđăh: Đon tơchĕng đơ̆ng Việt Nam hăm hơnih đak dơsĭ đơng Tư Chính jĭ drơ̆ng lăp hăm băl păng hlôi đei sơkơ̆t hơdăh lơ ‘măng.  Kiơ̆ kơ ‘noh, hơnih đak dơsĭ đơng Tư Chính jĭ 1 păh kơ đak dơsĭ Việt Nam păng pơjing trŏ lăp hăm Tơdrong tơchơ̆t Luơ̆t đak dơsĭ Liên hợp quốc sơnăm 1982.

Việt Nam khŏm tơjră rim tơdrong jang pơm glăi tơdrong pơm tơm, tơdrong gơh tơchơ̆t hăm dôm tơring đak dơsĭ kơ Việt Nam đei pơjing lăp hăm khôi luơ̆t apŭng plĕnh teh, mă loi ‘noh jĭ tơdrong tơchơ̆t đơ̆ng Liên hợp quốc găh Luơ̆t Đak dơsĭ sơnăm 1982. Việt Nam tŏk bŏk păng gô hơdrin vei lăng dôm tơdrong pơm tơm păng đei yua trŏ luơ̆t, ƀlep tơ̆ đak dơsĭ bơ̆n hăm dôm trong jang rơngei lăp hăm luơ̆t apŭng plĕnh teh.