Pơgê năr 14/8, Khul kơdră chĕp pơgơ̆r Đảng dêh char Dak Lăp pơgơ̆r hop akŏm pơtôch 10 sơnăm jang kiơ̆ Tơdrong tơchơ̆t kơsô̆ 33 kơ Hơnih chĕp pơgơ̆r Trung ương Đảng jăl XI găh “tơ iung pơjing păng atŏk tơ iung kon bơngai Việt Nam ‘lơ̆ng liĕm trŏ lăp hăm tơdrong ‘meh vă kơjăp ‘lơ̆ng teh đak” păng 15 sơnăm jang kiơ̆ Nơ̆r athei jang kiơ̆ kơsô̆ 38 đơ̆ng Ban Bí thư găh “Pơtrŭt kơtang bơ̆ jang ƀao hiêm jang pơgang lơ̆m chăl hle”. Hloh 15 sơnăm jang kiơ̆ Nơ̆r athei jang kiơ̆ kơsô̆ 38 đơ̆ng Ban Bí thư, trong jang ƀao hiêm jang pơgang hlôi bơ̆ jang ‘lơ̆ng jơ̆p jang lơ̆m tơdrong hơrih tơpôl, đei tơgop gĭt kăl lơ̆m bơ̆ jang vei lăng năng tông păng pơm hơtŏk pran jăng grăng akou kon pơlei. Hloh 10 sơnăm jang kiơ̆, dêh char Dak Lăk hlôi đei hloh 398.000/463.000 ŭnh hnam hơrih sa ‘lơ̆ng, jơnei 86%. Tơdrong oei sa joh ayŏ joăt joe ‘lơ̆ng liĕm rim hơdrung kon kông đei vei răk tơƀăk mong. Ƀok Nguyễn Đình Trung, Bí thư Đảng dêh char Dak Lăk hôn bơnê tơdrong hơdrin đơ̆ng rim hơnih đảng, hơnih bơ̆ jang lơ̆m jang kiơ̆ Tơdrong tơchơ̆t 33 păng Nơ̆r athei jang kiơ̆ kơsô̆ 38 đơ̆ng Ban Bí thư lơ̆m dêh char.