Vang năm đei rim bơngai joăt jang, bơngai khoa hŏk, kơdră chĕp pơgơ̆r hơnih jang păng kơdră tang măt 5 dêh char tơring Tây Nguyên. Jô̆ truh khei 6/2023, tơring Tây Nguyên đei 2.187 Hơp tak xah, lơ̆m au 1.600 Hơp tak xah choh jang sa, pă dôm yơ ‘nŏh Hơp tak xah Mơdro sa au to.

Mă đơ̆ng hlôi sơkơ̆t hơdăh hơnih dơ̆ng, hơnăp jang lơ̆m pơtrŭt mŭk drăm - tơpôl tơring Tây Nguyên atŏk tơ iung, mă lei kiơ̆ nơ̆r tơgop đơ̆ng kơdră tang măt tơ̆ Hop akŏm ‘noh rim Hơp tak xah tơ̆ tơring au jei tŏk bŏk tơjră muh măt hăm lơ tơdrong long păng tơdrong găn ga nhen: găh tơdrong hlôh vao; găh kon jên jang păng khul jang…Vă mŭk drăm Hơp tak xah tơring Tây Nguyên yak hloh tơnap tap hơnơ̆ng atŏk tơ iung, tơ̆ Hop akom rim kơdră tang măt hlôi akŏm pơma dơnuh, hơlen hơdăh tơdrong atŏk tơ iung mŭk drăm Hơp tak xah tơring Tây Nguyên hrei au; tơdrong tơm pơm ăn truh tơdrong tơnap tap, hrat hrĭn păng pơchoh trong jang kăl vă pơtrŭt kơtang mŭk drăm Hơp tak xah tơ̆ tơring Tây Nguyên hơnơ̆ng atŏk tơ iung lơ̆m khei năr kơnh.