Tơ̆ hop akŏm, Anih jang vei lăng kon pơlei apŭng Đức Cơ hlôi kĭ păng pơjao “Hla bar pơkăp jang hadoi 7 tơdrong jang kơ 7 Anih asong jang gah tơdrong ming man anih jang, jang pơgang hơmet Jĭ jăn, choh jang sa – jang gah bri. Đức Cơ jing apŭng gah pơmơ̆t dêh char Gia Lai, đei anih dơ̆ng kăp gĭt lơ̆m tơring kơlang hơtŏk tơ-iung Việt Nam- Lào-Campuchia. Jô̆ truh sơnăm 2023, apŭng Đức Cơ hlôi đei 13.000 ha kơsu, 26.000 ha tơm găr sơlơ̆k, 9.000 ha kaphê, jê̆ 1.000 ha sâu riêng păng 680 ha tiu. Atŭm hăm noh, tơdrong jang rong kon tơrong kơ apŭng adoi tŏk bŏk hơtŏk sơđơ̆ng.

‘Nguaih kơ noh, apŭng Đức Cơ đei lơ mŭk drăm gah hơtŏk tơmang pơhiơ̆, mă kăl noh tơmang pơhiơ̆ pơlei pơla. Hăm dôm mŭk drăm, tơdrong pran ‘nao roi tơ̆ kơpal, apŭng Đức Cơ sơkơ̆t hơtŏk păng hơvơn asong jang lơ̆m dôm tơdrong choh jang xa, hơtŏk mŭk drăm choh pơtăm kiơ̆ trong hơtŏk kơjă tơmam drăm, mă kăl noh hơtŏk tơnăp tơdrong tơgar jang kơ dôm tơmam choh pơtăm dơnơm kơ apŭng lơ̆m tơring.