Kiơ̆ kơ noh, đơ̆ng năr 20 truh năr 23/9/2023, tơ̆ pơlei tơm Đà Nẵng pơgơ̆r Hop akŏm Ƀô̆ trương Tơroi tơbăt ASEAN 'măng 16 (krao kơđeh noh 16th AMRI), Hop akŏm Ƀô̆ trương Tơroi tơbăt ASEAN+3 'măng mă 7 (krao kơđeh noh 7th AMRI+3) păng dôm Hop akŏm đe Kơdră kơpal đei tơrĕk. Pơhlom 60 'nu chih hla bar tơroi lơ̆m teh đak truh hop akŏm hla bar tơroi.

Pơgơ̆r 'măng hop akŏm hla bar tơroi, ƀok Nguyễn Thanh Lâm, Thư̆ trương Anih tơm Tơroi tơbăt ăn tơbăt, hơnăn kơ tơdrong Hop akŏm 'noh “Tơroi tơbăt: Đơ̆ng kơtơ̆ng ang truh Kơ̆l 'ngok hơgei kơyuơ minh ASEAN Pơtrŏ Hơbĕch hơbal”. 'Nâu jing hơnăn đei Việt Nam rơih hơlen lơ̆m tôm tơdrong hop akŏm păng tơdrong jang 'nguaih kơ hop akŏm 'măng âu. Hơnăn tơroi hơdah sơnong jang tơroi tơbăt lơ̆m khei năr 'nao, hơ-'nhăk tơroi tơbăt jing jơhngơ̆m pran vă hơtŏk tơ-iung, ưh hơdrô̆ pơtơ̆ng tơroi tơbăt mă oei hơtŏk tơplih đơ̆ng kơtơ̆ng ang jing kơ̆l 'ngok hơgei, pơjing minh ASEAN hơbĕch hơbal, hơtŏk tơdrong hơgei lơ̆m lăm, kĕ tơjră păng pơtrŏ hăm sơnong jang, anih dơ̆ng kơ ASEAN ưh hơdrô̆ hăm tơdrong đei ƀôh lơ̆m jơnŭm jang mă oei kơchăng tơjră hăm dôm tơdrong đei ƀôh lơ̆m kơpal teh hrei âu.