Tơ̆ Hop akŏm, dôm bơngai tang măt roi tơbăt dôm tơdrong kăl đei chih iŏk, tơchă dơ̆ng tơdrong ‘lơ̆ng vă jang hơdoi lơ̆m tơdrong jang ming man, atŏk tơiung tơring kơdrâm păng tơring tơrang đơ̆ng dôm tĕh đak ASEAN păng Trung Quốc, kiơ̆ đơ̆ng nŏh tơgop bơ̆ jang đei tơdrong vă jang tơm truh sơnăm 2030 găh jang atŏk tơiung pran kơjăp đơ̆ng Liên Hiệp quốc. Pơma tơ̆ hop akŏm âu, Kơdră vei lăng tơdrong ming man Nguyễn Thanh Nghị ăn tơbăt, Việt Nam găh grŭp 10 tĕh đak tơm dơnơm pŭ lơ tơdrong sar bar đơ̆ng tŏ ‘mi kial tơplih lơ̆m apŭng plenh tĕh.

Ƀok Kơdră Nguyễn Thanh Nghị pơma tơlĕch lơ đon tơchĕng păng trong vă jang atŏk tơiung tơring kơdrâm kơjăp ‘lơ̆ng, rơgŏh, gơ̆h hơgei, lăp hăm tŏ ‘mi kial tơplih, pơm tơjur ƀiơ̆ tơdrong tơlĕch kơchơ̆t ‘mê̆ ‘mach, iŏk kon bơngai pơm tơm păng ưh đei hŭt hơchăng bu tơ̆ rŏng. Ƀok kơdră lui, tơdrong iŏk đei đơ̆ng hop akŏm âu, kŭm hăm nơ̆r tơchơ̆t “Drơ̆ng nơ̆r Nam Ninh” gô tơgop gĭt kăl, vang pơm hơtŏk tơdrong jang hơdoi tôm tơdrong ASEAN păng Trung Quốc pơma atŭm, tơdrong jang hơdoi ASEAN păng Trung Quốc lơ̆m tơdrong ming man pơma adrô̆ roi tŏk pran ‘lơ̆ng păng đei yoa hlŏh dơ̆ng.