Pơma ƀât blŭng hop akŏm, Kơdră Kuô̆k hô̆i Vương Đình Huệ rơroi, tơ̆ hop akŏm mă 5, Kuô̆k hô̆i vă bơ̆ jang lơ tơdrong, đei hloi tơdrong chih pơjing luơ̆t, dăr lăng păng tơchơ̆t dôm tơdrong tih, gĭt kăl. Dôm tơdrong vă tơgop nơ̆r tơtă dôm tơdrong pơmat tat ngăl, mă loi jĭ dôm tơdrong ƀơm truh tơ̆ tĕh, chă bơngai răt, bơngai jang, găh kơjă tơmam, hnam oei… Yoa thoi nŏh, kiơ̆ Kơdră Kuô̆k hô̆i, hop akŏm ‘măng mă âu vă sek tơlang tôch hơlen dôm tơdrong oei đei đon tơchĕng phara băl păng athei đei tơdrong drơ̆ng nơ̆r đơ̆ng anih chih tơroi păng anih hơlen năng.

Akhan, 1,2 tơdrong ưh jăh gơih ăn anih hơlen păng Anih chĕp kơ̆l pơgơ̆r Kuô̆k hô̆i hlôi ƀơm ưh ‘lơ̆ng truh tơdrong bơ̆ jang kiơ̆ trong jang đei tơlĕch; 1,2 tơdrong gĭt kăl đei tơroi ăn Kuô̆k hô̆i truh dang ei dôm anih tơm oei tam mă drơ̆ng nơ̆r, Kơdră Kuô̆k hô̆i athei, hăm dôm tơdrong tih, pơmat tat, oei đei lơ nơ̆r phara băl ‘nŏh anih chih tơroi, dôm anih tơm, anih jang kơpal athei pơma nuh mă hơlen, drơ̆ng nơ̆r hăm băl ‘mơ̆i mă gơ̆h pơlung đei Kuô̆k hô̆i. 

Thủ tướng tĕh đak athei Kuô̆k hô̆i, Anih chĕp kơ̆l pơgơ̆r Kuô̆k hô̆i tơrĕk truh trong klăih song hơnăp jang, tơdrong chĕp kơ̆l pơgơ̆r vă hơmet pơ ‘lơ̆ng dôm tơdrong oei tơhlăk mưh bơ̆ jang. Găh Khul kơdră tĕh đak, tơ̆ hơnăp kơnh, Khul kơdră tĕh đak vă adrin bơ̆ jang tơdrong klăih song hơnăp jang, tơdrong chĕp kơ̆l pơgơ̆r hơdai hăm hơtŏk đon jang tơnăp.