Tơ̆ hop akŏm, rim bơngai joăt jang, bơngai jang tơchĕng hơlen akŏm pơm hơdăh păng hơnơ̆ng sơkơ̆t hơdăh tơdrong tơgop tih tên đơ̆ng Đại tướng Đoàn Khuê - Bơngai kŏng san mĭnh jơhngơ̆m đon, bơngai ‘lơ̆ng găh jơhngơ̆m đon kĕch mang, prăt jơhnơr plang ăn tơdrong jang kĕch mang kơ Đảng, Hơdrech hơdrung păng Khul Ƀô̆ đô̆i. 

Thượng tướng Lê Huy Vịnh, Kơ iĕng Kơdră chĕp pơgơ̆r Hơnih tơm Ƀô̆ đô̆i vei lăng sơlam teh đak pơma hơdăh: Prăt 60 sơnăm bơ̆ jang kĕch mang, Đại tướng Đoàn Khuê hlôi iŏk jang lơ kơchư̆k jang phara dih băl. Mă đơ̆ng tơdrong jang yă kiơ, kơchư̆k yă kiơ, ƀok Đoàn Khuê jei hơnơ̆ng vei kơjăp jơhngơ̆m đon ‘lơ̆ng kơ bơngai jang kĕch mang, mĭnh jơhngơ̆m đon kơ yuơ kơ Teh đak, kơ yuơ kơ kon pơlei; pơchoh trong gơ̆h hơgei, nuih mơng lơ̆m chĕp pơgơ̆r, pơrô̆, jang kiơ̆ keh đang ‘lơ̆ng rim tơdrong jang mă Đảng, Teh đak păng Kon pơlei pơjao ăn.