Pơma ăh hop akŏm, Thủ tướng Phạm Minh Chính ră hơdăh, bơ̆n hlôi đei tơmơ̆ng minh ƀar nơ̆r pơtruh kăp gĭt, trŏ hăm tơdrong hơrih păng pơkăl đơ̆ng tang măt ăn anih jang mŭk drăm, anih axong jang. Mă kăl, hlôi đei tơmơ̆ng ƀok Phŏ Thủ tướng Trung Hoa Lưu Quốc Trung pơma, lơ̆m noh xơkơ̆t hơdăh, trong jang tơbôl tĕch pơdro, axong jang kơ 2 teh đak.

Thủ tướng pơkăl dôm Anih jang tơm: Anih axong jang, Kŏng thương păng dôm anih jang đei tơrĕk kơ Việt Nam tenh kuăng akŏm dôm nơ̆r tơgop hơdăh vă chă hơlen keh đang chih akŏm khôi luơ̆t, pơ 'lơ̆ng tơdrong axong jang tĕch pơdro; atŭm hăm noh, pơkăl dôm anih jang tơm, rim anih jang kơpal kơ 2 teh đak dăh tenh kuăng hơlen, keh đang dôm tơchơ̆t tơlĕch jang hadoi vă pơm trong hiôk ăn anih jang mŭk drăm pơma atŭm, lơ̆m noh đei anih jang mŭk drăm Trung Quốc.