Đơ̆ng blŭng sơnăm truh dang ei, tŏ ‘mi kial hlôi pơm 14 ‘nu bơngai lôch, hiong păng răm gah mŭk tơmam đei truh 400 tih hlj. Tŏ ‘mi kial pơrăm đei ƀôh jơ̆p teh đak. Tơngiĕt kơtang tơ̆ tơring Tu; tŏ pơđang, đak ƀăt hram, teh hơlih păng đak lơ̆p kơyuơ đak dơsĭ tŏk blai tơ̆ tơring tơmăn đak krong Cửu Long, Tây Nguyên; ‘mi tih, grơ̆m kơmlat đak lŏk jroh, ‘mi prĕl đei ƀôh tơ̆ 19 dêh char gah Tu păng Tu Tŏk bŏk.

Sơkơ̆t tôch hop akŏm, Phŏ Thủ tướng Trần Lưu Quang ră hơdah, tơdrong jang tang găn păng tơjră tŏ ‘mi kial pơrăm oei đei 6 tơdrong. Lơ̆m noh đei tơjruh gah tơdrong tơnăp đơ̆ng kon pơlei păng anih jang kơpal; tơdrong chă hơlen pơgơ̆r jang hơdrol kơ pơyan ‘mi kial đei tơring jang tam mă tơnăp. Phŏ thủ tướng pơkăl rim anih jang, jơnŭm kơdră kơpal păng rim tơring kơchăng hơmet dôm tơdrong tơjruh âu.