Anih pơgơ̆r hop akŏm iŏk đei hlŏh 40 ƀai chih tơblang đơ̆ng dôm bơngai lăng ƀôh sơ̆ păng dôm bơngai jang khoa hŏk. Tơring tĕh păng tơdrong đei tơpă tơ̆ yăn âu lơ̆m jơhnơr arih hlôi hơnhăk Quảng Trị jing tơring tĕh đei hơnăp jang tôch gĭt kăl găh chinh trĭ, khul linh lơ̆m tơdrong tơiung pơjing păng vei lăng tĕh đak.

Tơring ‘nâu mĭnh brŭh đei năng jĭ “tơring tơblăh kơtang”, “tơring vei lăng, tơblăh tang găn blŭng a”, lơ̆m nŏh jơhnơr arih hlôi chih tơbăt khei ‘năr tôch gĭt kăl ‘nŏh jĭ tơring pơjing anih jang kơ Khul kơdră Kăch mang tơring Pơbăh Việt Nam đơ̆ng 1973-1975.

Ƀok Nguyễn Đăng Quang, Phó Bí thư chĕp kơ̆l đảng dêh char Quảng Trị tơƀôh đon hơpơi ‘mĕh, kiơ̆ đơ̆ng hop akŏm âu, dôm hla ar chih tơblang, tơmam khoa hŏk gô đei pơma tơblang tôch hơlen vă pơm hơdăh hlŏh dơ̆ng tơdrong gĭt kăl lơ̆m jơhnơr arih, hơnăp jang đơ̆ng Khul kơdră Kăch mang tơring Pơbăh Việt Nam lơ̆m khei ‘năr tơblăh Mi, dŏng tĕh đak.